Ақмола облысында дәрігерлерге пәтер беріледі

КӨКШЕТАУ. ҚазАқпарат – Ақмола облысының Жақсы ауданында дәрігерлер үшін аудандық аурухананың жұқпалы аурулар бөлімшесі 8 пәтерлі тұрғын үй ретінде қайта жабдықталуда, деп хабарлайды ҚазАқпарат тілшісі аудан әкімдігіне сілтеме жасап.

Әкімдіктің мәліметінше, қазіргі кезде павлодарлық мердігер компания «ПавлодарЭнергоМонтаж» ЖШС-гі аурухана аумағында құрылыс жұмыстарын жүргізуде.

«Ғимарттың жалпы аумағы 474 шаршы метрді құрайды. Онда жоспар бойынша 4 бір бөлмелі және 4 екі бөлмелі 8 пәтер болады»,- дейді аудандық құрылыс бөлімінің басшысы Д.Кощегулов.

Әкімдіктен атап өткендей, биылғы жылдың желтоқсан айында дәрігер мен аудандық аурхананың қызметкерлері осы ғимараттан пәтер кілтін алатын болады.