Ақмола облысында тіл онкүндігінде 1000-ға жуық шара өтеді
КӨКШЕТАУ. ҚазАқпарат - Ақмола облысында тіл онкүндігі шеңберінде 1000-ға жуық онлайн шара өткізілетін болады. Бұл туралы журналистермен өткен брифингте облыстық ішкі саясат басқармасының басшысы Алтынай Әміренова айтты, деп хабарлайды ҚазАқпарат тілшісі.
Басқарма басшысы атап өткендей, тиісті қабылданған құжатқа сәйкес «Қазақстан Республикасындағы тіл саясатын іске асырудың 2020-2025 жылдарға арналған мемлекеттік бағдарламасын іске асыру жөніндегі облыстық іс-шаралар жоспары» бекітілген. Осы жоспар сәйкес тіл онкүндігі шеңберінде өңірде бірқатар шаралар қолға алынбақшы. Коронавирусқа байланысты олардың барлығы онлайн формантында өткізу жоспарланған.
«Ақмола облысы бойынша тіл онкүндігі аясында 1000-ға жуық онлайн іс-шара өткізіледі, оған 200 мыңға жуық адам қатысады. Нақтырақ айтсам, «Ұлы Даланың ұлы Тілі» Түркия, Англия, Франция, Мажарстан елдерінің этникалық қазақ қоғамдықтарының қатысуымен халықаралық онлайн конференциясы, «Тіл - халықтың ұлы байлығы, бала тілі – бал бүлдіршіндер» атты онлайн фестивалі, Әбу Насыр әл-Фарабидің 1150 жылдығына орай аудан жастары арасында «Қайырымды қала тұрғындарының көзқарастары жайлы трактатынан» үзінділер жатқа айту сайысы, Абай Құнанбайұлының 175 жылдық мерейтойына орай «Абай тілі – ғасыр үні» атты мәнерлеп оқу, бейне байқаулар сайысы және басқа да шаралар ұйымдастырылады» - деді басқарма басшысы Алтынай Әміренова.