Ақмола облысында зираттан қару-жарақ пен патрондар табылды
КӨКШЕТАУ. ҚазАқпарат - Көкшетау қаласы полиция басқармасының қызметкерлері Щучинск қаласына қарай орналасқан зират аумағынан атыс қару-жарағы жасырылған орынды тапты, деп хабарлайды ҚазАқпарат.
Рolisia.kz сайтының мәліметінше, жасырын жерден полицейлер «НЦ-12» маркалы тегіс ұңғылы аңшы мылтығын, «Сайга-410» маркалы тегіс ұңғылы мылтықты, 36 және 9 калибрлі патрондар тапты. Табылған қарулар мен патрондар сараптамаға жіберілді.
«Тексеру барысында олардың иесі анықталды. Ол 48 жастағы Солтүстік Қазақстан облысының тұрғыны болып шықты. Ер адам 2015 жылы полицияға қарудың жоғалғаны туралы өтінішпен жүгінген.
Қаруды жоғалту немесе ұрлау оның иесін әртүрлі жауапкершілікке әкеп соғуы мүмкін. Бұндай жағдай орын алса, дереу полицияға хабарлау қажет». – делінген полиция мәліметінде.
