Ақмола облысындағы тасжолда 5 көлік соқтығысып, екі адам зардап шекті
КӨКШЕТАУ. ҚазАқпарат – «Астана-Петропавл» тас жолында 5 көлік соғылып, екі жолаушы зардап шекті, деп хабарлайды ҚазАқпарат тілшісі.
Ақмола облыстық Полиция департаменті баспасөз қызметінің мәліметінше, 21 желтоқсанда «Астана-Петропавл» тасжолының 90 шақырымында ірі жол апаты болған.
«Анықталғандай, Астана бағытында жүріп келе жатқан Алматы облысының 35 жастағы тұрғыны басқарған «Тойота Прадо 150» автокөлігі алда жүріп бара жатқан «КамАЗ 5320» жүк көлігімен соқтығысты. Жүк көлігін Шортанды ауданының 41 жастағы тұрғыны басқарған. Кейін бұларға «Тойота Камри», «Хюндай Элантра», «Порше Панамера» автокөліктері келіп соқтығысты. Жол апаты салдарынан «Хюндай Элантра» автокөлігінің 2 жолаушысы түрлі дене жарақаттарымен Ақкөл қаласының орталық ауруханасына жатқызылды», деді ведомстводан.
Қазір кезде, осы жол апатына байланысты Қылмыстық кодекстің 345-бабының 1-бөлігі бойынша сотқа дейінгі тергеу амалдары жүргізілуде.
Айта кетсек, үйінде 2 келі марихуана сақтаған Ақмола облысының тұрғынын әйелі полицияға ұстап берді.
