Ақмола облысының Аршалы кентіндегі түзету мекемесінде кәсіптік мектептің филиалы ашылады
АСТАНА. Қаңтардың 30-ы. ҚазАқпарат /Ғалымжан Хасенов/ - Адамның білім және мамандық алуға деген конституциялық құқығын жүзеге асыру аясында ертең,
Ақмола облысының Аршалы кентіндегі түзету мекемесінде өңірлік білім басқармасының «№14 кәсіптік лицейі» филиалының салтанатты ашылу рәсімі өтеді, деп хабарлайды ҚазАқпарат.Мекеме бастығының орынбасары Алексей Тереннің айтуынша, бұл шараға қылмыстық-атқару жүйесінің қызметкерлерімен қоса, Аршалы ауданы әкімінің орынбасары Талғат Мәмбетов, Ақмола облыстық білім басқармасының бастығы Мұрат Ыбраев, №14 кәсіптік лицейдің директоры Алексей Карманов қатысады. Бұл кәсіптік мектеп газ-электр дәнекерлеушілерін дайындайтын болады. Жылдың бірінші жартысында 40-қа жуық сотталушыны оқыту жоспарланып отыр. Ал алдағы жаңа оқу жылында әрқайсысы 20 адамнан тұратын 4 топ дайындалады, сондай-ақ қосымша жұмысшы мамандықтары да енгізіледі.
