17:47, 20 Қыркүйек 2017 | GMT +5
Ақмолада шағын және орта бизнесті қолдау үшін 14,9 миллиард теңге қаржы бөлінген
КӨКШЕТАУ.ҚазАқпарат - Ақмола облысында 2010-2017 жылдары шағын және орта бизнесті дамыту үшін «Бизнестің жол картасы-2020» мемлекеттік бағдарламасы шеңберінде 14,9 миллиард теңге қаржы бөлінген. Оның ішінде 2017 жылы бөлінген ақшаның көлемі 4,8 миллиард теңгені құрады, деп хабарлайды ҚазАқпарат тілшісі.
Бағдарлама жүзеге асқаннан бергі 8 жылдың ішінде оның қатысушылары тарапынан 67,3 миллиард теңге көлемінде салық төленген.
Ақмола облыстық кәсіпкерлік және өнеркәсіп басқармасының мәліметі бойынша, бағдарлама қолға алынғаннан бері 682 жоба қолдау тапқан. Биылғы жылдың 8 айында 16 жоба қолдау тауып, 15 мың жаңа жұмыс орны ашылған.
Сонымен қатар, өңірде кәсіпкерлікті дамыту шеңберінде облыстық бюджет есебінен қаржыландырылатын «Шағын және орта кәсіпкерлік субъектілерін өңірлік қаржыландыру» бағдарламасы және «Даму» кәсіпкерлікті дамыту қоры жұмыс істейді.
Оған қоса, өңірде кәсіпкерлікті қолдаудың қаржылай емес шаралары жүзеге асырылуда. Оның ішінде жұмыс істеп жатқан бизнеске сервистік қолдау, менеджерлердің тегін кеңесі мен жобалық оқытуы бар.