Ақмолада трактор пен мотоцикл соқтығысып, екі адам көз жұмды
КӨКШЕТАУ. ҚазАқпарат – Ақмола облысында «К-701» тракторы мен мотоцикл соқтығысып, екі адам көз жұмды, деп хабарлайды ҚазАқпарат тілшісі облыстық Полиция департаментінің баспасөз қызметіне сілтеме жасап.
Ведомствоның мәліметінше, тамыздың 28-де Жақсы аудандық ПБ кезекшілік бөліміне жергілікті ЖШС бірінің диспетчері хабарласып, мотоциклге отырған екі адамның ауыл арасындағы жолда «К-701» тракторымен соқтығысқанын және зардап шеккендер барын айтқан.
«Оқиға орнына жеткен полиция қызметкерлері оның себебін анықтады. Белгілі болғандай, «К-701» тракторының 46 жастағы жүргізушісі ауыл арасындағы жолмен Белағаш ауылына жүріп бара жатқан. Сол кезде оған қарсы бағыттан шыққан «Racer» мотоциклі соғылған. Жол-көлік оқиғасынан мотоциклдің 26 жастағы жүргізушісі мен 36 жастағы жолаушысы алған дене жарақатынан сол жерде көз жұмды», - дейді ведомстводан.
Ведомстводан атап өткендей, қазіргі кезде «К-701» тракторының жүргізушісіне қатысты «шақырған уақытта келу міндетті» процессуалдық шарасы қолданылды. Сонымен бірге, ҚР ҚК 345 бабының 3 бөлігі бойынша сотқа дейінгі тергеу амалдары жүргізілуде.
