Ақмолада волонтерлер денсаулығы нашар жандарға дәрі-дәрмек жеткізуде
КӨКШЕТАУ. ҚазАқпарат - Ақмола облысында волонтерлер денсаулық жағдайы бойынша есепте тұрған адамдарға қажетті дәрі-дәрмекті үйіне жеткізіп беруде, деп хабарлайды ҚазАқпарат тілшісі.
Бұл туралы Ақмола облыстық жастар ресурстық орталығының жанындағы Волонтерлерді қолдау орталығы әлеуметтік желідегі парақшасында жариялады.
Волонтерлерді қолдау орталығының маманы Кеңес Аңсардың айтуынша, волонтерлер 2 күн ішінде 30-дан астам үйді аралап, денсаулық жағдайы бойынша есепте тұрған адамдарға қажетті дәрі-дәрмекті жеткізіп берді.
«#bizbirgemiz акциясы шеңберінде қолға алынған акцияның мақсаты - коронавирус инфекциясының таралу қаупі жағдайында азаматтардың байланысын барынша шектеу. Қайырымдылық акциясына қолдау көрсетіп біздің медицина саласындағы қызметкерлеріне көмектесейік», - дейді акцияға қатысушылар.
