Ақмолалық баскетболшы қыздар ел чемпионы атанды
КӨКШЕТАУ. ҚазАқпарат – Ақмола облысының баскетболшы қыздары Қазақстан чемпионы атанды, деп хабарлайды ҚазАқпарат тілшісі облыстық дене шынықтыру және спорт басқармасының баспасөз қызметіне сілтеме жасап.
Ведомвстоның мәліметінше, Тараз қаласында баскетболдан 3×3 форматында өткен Қазақстан чемпионатына еліміздің әр өңірінен жиналған 49 команда қатысып, бақ сынады. Оның ішінде ақмолалықтар бір алтын және екі күміс медаль иеленді.
«Ақмола облысы атынан қыздар арасында 2007-2008 жылдары туған U-12, 2005-2006 жылдары туған U14 және 2003-2004 жылдары туған U16 үш команда қатысты. Олардың арасында U-12 командасы ел чемпионы атанса, U14 және U16 командадары екінші орын алды. Сонымен қатар, 12 жастағылар арасында Милана Крутевич, ал, 14 жастағылар арасында Айдана Қасенова үздік ойыншы атанды», - дейді Ақмола облыстық дене шынықтыру және спорт басқармасының баспасөз хатшысы Махаббат Большина.
