Ақмолалық дәрігерлер қопсытқыш пышағына құлаған әйелді құтқарды

КӨКШЕТАУ. ҚазАқпарат - Ақмола облыстық аурухана дәрігерлері Көкшетау тұрғынынан қопсытқыш  пышағының қалдығын алды, деп хабарлады Ақмола облысы денсаулық сақтау басқармасының баспасөз қызметі.

Мамыр ортасында саяжайда әйел жұмыс істеп тұрған қопсытқыштың үстіне құлаған. Жағдайдың күрделі болғаны соншалық, оқиға орнына жедел жәрдем ғана емес, жедел құтқару жасағын да шақыртуға тура келді.

Қопсытқыш пышағы әйел денесінің тініне терең  кіріп, аяғын жарақаттағаны жағдайды ушықтыра түсті.  Дәрігерлер зардап шеккен әйелге шокқа қарсы терапия жасап, пышақ бөлігін алып шықты.

Темір қалдығын алу мүмкін болмай, әйел Ақмола облыстық ауруханасына жатқызылды. Аса ауыр жағдайдағы әйел жансақтау бөліміне жатқызылды. Онда   жамбас сынығы, кіші жамбас мүшелерінің елеулі жарақаты тіркелді. Әйел жеті күн  жасанды өкпе желдеткіш аппаратына қосулы болды.