Ақпараттық жүйесі жиі істемей қалады: Бектенов ХҚК орталықтары қызметін сынға алды

АСТАНА. KAZINFORM — Халыққа қызмет көрсету орталықтарының жұмысын жақсарту бағытында бірқатар шара қолға алынды.

Бұл туралы «Азаматтарға арналған үкімет» мемлекеттік корпорациясы» КЕАҚ басқарма төрағасы Арман Кенжеғалиев айтты.

— Халыққа қызмет көрсету орталықтарының қызметіне шағым көп түсіп жатыр. Ақпараттық жүйелерінің тоқтап қалуына қатысты сұрақтар бар. Осы бағытта қандай жұмыс атқарылып жатыр? — деп сұрады Олжас Бектенов Үкімет отырысында Арман Кенжеғалиевтен.

Спикер өз кезегінде бұл бағытта қандай жұмыстар атқарылып жатқанын мәлімдеді. 

— Шынында да осындай мәселе бар. Оны шешу үшін біз бірқатар жұмыс атқардық. Арнайы жүйелерді іске қостық. Жүйеге деректерді қолмен енгізу мүмкіндігін жойдық. Салық және кеден органдарымен интеграция арқылы тиісті деректерді аламыз. Сыбайлас жемқорлыққа қарсы іс-қимыл органдарымен бірге мамандандырылған халыққа қызмет көрсету орталықтарында жұмысты жақсартып жатырмыз, — деді Кенжеғалиев.

Бұған дейін eGov арқылы кедергі келтірген көлік иелеріне анонимді хабарлама жіберуге болатыны хабарланды.

Сондай-ақ, 7 мыңнан аса қазақстандық жүргізуші куәлігін екі батырманы басу арқылы ауыстырғаны белгілі болды.