Ақпараттық-коммуникациялық саланың ішкі жалпы өнімдегі үлес салмағын 5 пайызға дейін жеткізу көзделіп отыр - ҚР Ақпараттандыру агенттігі

АСТАНА. Желтоқсанның 22-сі. ҚазАқпарат /Арман Асқаров/ - 2014 жылда еліміздегі ақпараттық-коммуникациялық саланың ішкі жалпы өнімдегі үлес салмағын  5 пайызға дейін жеткізу көзделген.

 Бұл туралы бүгін ҚР Ақпараттандыру және байланыс агенттігінің жауапты хатшысы Болат Махамбетажиев мәлім етті, деп хабарлайды ҚазАқпарат.

Оның айтуынша, бүгінгі таңда бұл көрсеткіш 3,3 пайызға тең. «Алдағы 4 жылда Қазақстанның ақпараттық -коммуникациялық саласының негізгі үш саласы - телекоммуникациялар, пошта қызметі мен ақпараттық технологияларды дамыту арқылы бұл саланың жалпы ішкі өнімдегі үлес салмағын 5 пайызға дейін жеткізу жоспарланған. Демек, 2014 жылы оның үлесі 1100 млрд. теңге болмақ», деді Б. Махамбетажиев.

Айта кетейік, қазіргі кезде еліміздің ақпараттық-коммуникациялық саланың ішкі жалпы өнімдегі үлес салмағы 521 млрд. теңгені құрап отыр.