Ақсай қаласында пәтердегі өрт орнынан 58 жастағы ер адамның мүрдесі табылды

БҚО ТЖ департаментінің баспасөз қызметінен мәлім еткеніндей, оқиға 18 маусым күні таңға таман болды. 

«Сағат 04.31-де қаланың 4-шағынауданында көп қабатты үйде өрт болып жатқаны жөнінде хабар түскен. Төртінші қабаттағы пәтерлердің бірінде аумағы 20 шаршы метр асүй бөлмесі отқа оранған. Өрт орнынан пәтер иесі – 1966 жылғы ер адамның денесі шығарылды. Үйдің бесінші қабатынан автобаспалдақтың көмегімен 6 адам эвакуацияланса, соның біреуі – бала. «Тілсіз жау» сағат 05.20-да оқшауланып, 05.30-да ауыздықталды. Қазіргі кезде өрттің шығу себебі, келтірілген шығын анықталу үстінде. Осыған дейін облыста жыл басынан бері өрт салдарынан 3 адам көз жұмған еді», - деп хабарлады ведомстводан.

Еске сала кетейік, бұдан бұрын Оралда 59 жастағы ер адамның өзіне-өзі қол жұмсағанын жазған болатынбыз.