АҚШ 2030 жылға қарай Ресей аумағына ғарыштан соққы бере алады
АСТАНА. Тамыздың 11-і. ҚазАқпарат - АҚШ 2030 жылға қарай ғарыштан Ресейдің бүкіл аумағына соққы бере алады, деді сейсенбі күні журналистерге берген сұхбатында Ресей Әскери-Әуе күштерінің бас қолбасшысы генерал-полковник Александр Зелин.
Бұл туралы «РИА «Новости» агенттігі хабарлады.
«Шет мемлекеттердің әуе-ғарыштық шабуылдау техникаларының дамуы, 2030 жылға дейін қарулы күрестің біртұтас саласы ретінде әуе-ғарыш кеңістігін игеруде түбегейлі өзгерістер болатынын көрсетіп отыр», деді генерал-полковник өз сөзінде.
«Шет мемлекеттердің, бірінші кезекте АҚШ-тың Әскери-Әуе күштері 2030 жылға қарай Ресей Федерациясының аумағындағы барлық нысаналарға ғарыштан аса дәл соққы беру мүмкіндігіне ие болады», деп атап көрсетті Зелин өз сөзінде.
Қолбасшының айтуынша, ал одан 10 жыл бұрын, нақтырақ айтқанда, 2010 жылы - Ресейде Әскери-Ғарыш қорғанысы жөніндегі әскери күштердің мүлдем жаңа түрі құрылатын болады.
