АҚШ, Германия, Оңтүстік Корея және Үндістан туристері елімізде 4 күн болады
АСТАНА. ҚазАқпарат – eQonaq ақпараттық жүйесінің дерегіне сәйкес, АҚШ, Германия, Оңтүстік Корея және Үндістаннан келген туристер елімізде орта есеппен 4 күн өткізеді, деп хабарлайды ҚазАқпарат тілшісі Мәдениет және спорт министрлігінің баспасөз қызметіне сілтеме жасап.
Елімізде саяхаттау мерзімі бойынша Өзбекстан туристері көш бастап тұр. Көрші елдің азаматтары Қазақстанда 10 күнге дейін тоқтайды.
Ал, ресейлік туристер 6 күн, Беларусь азаматтары 5 күн, Германия туристері 4 күн болса, Қытай азаматтары елімізде 3,5 күн өткізеді екен.
«eQonaq жүйесі – елімізге келген туристер ағынын бақылау және талдау, орналастыру орындарының тізілімін құру және тағы басқа бірнеше маңызды функцияны орындайды. Басты мақсат – туристерге көрсетілетін қызметтердің ашықтығы мен сапасын арттыру. Жүйеге 3 214 орналасу қызметін ұсынатын кәсіпкерлік нысаны тіркелген», - деді Мәдениет және спорт министрлігінің баспасөз хатшысы Мөлдір Әбдуалиева.
