АҚШ Канададан алкоголь өнімдерін импорттауға тыйым салады
АСТАНА. KAZINFORM — АҚШ Канададан алкоголь өнімдері мен бірқатар тауарларды импорттауға тыйым салып, басқа канадалық өнімдерге баж салығын арттырады, деп хабарлайды Euronews.
АҚШ президенті Дональд Трамп 8 қыркүйек кешке бірқатар жарлыққа қол қойды. Ақ үйдің мәліметінше, бұл шешім Канаданың америкалық тауарларға жаңа баж салығын енгізуіне жауап ретінде қабылданған.
Трамптың жарлықтарына сәйкес, 15 қыркүйектен бастап Канададан импортталатын матрастар, моторлы қайықтар мен гольф-карларға және бірқатар басқа тауарға 50 пайыздық қосымша баж салығы салынады.
Ал Канададан алкоголь өнімдерінің әртүрлі түрлерін, сондай-ақ сарысу секілді сүт өнімдерін импорттауға тыйым салу 29 қыркүйектен бастап күшіне енеді.
Еске сала кетейік, 8 қыркүйекте Канаданың америкалық тауарларға қатысты жауап баж салығы күшіне енді. Бұл Оттава мен Вашингтон арасындағы сауда шиеленісін одан әрі күшейтті.
Канаданың жаңа тарифтері жалпы құны 20 млрд доллар болатын АҚШ тауарларын қамтиды. Баж мөлшері 15 пайыздан 50 пайызға дейін белгіленген.
Жаңа тарифтерге АҚШ-тан жеткізілетін болат, алюминий, ірімшік, тұрмыстық техника, киім-кешек, косметика және ауыл шаруашылығы техникасы секілді тауарлардың кең ауқымы енді.
Бұған дейін, тамыз айының соңында Дональд Трамп АҚШ пен Канада шекарасындағы Онтарио көлінің атауын «Америка көлі» деп өзгерту туралы жарлыққа қол қойған болатын.
Бұл шешім Вашингтон мен Оттава арасындағы сауда соғысы жағдайында қабылданды.
