АҚШ-та белгісіз біреулер мерекелік шеруге оқ атты, екі адам қаза тапты
АСТАНА. ҚазАқпарат - Жексенбі күні Американың Миссисипи штатының оңтүстігіндегі Пасс-Крисчен қаласында белгісіз біреулер Марди-Гра - католиктердің діні мейрамына орай өткізілген шеруге оқ атқан. Жергілікті билік өкілдерінің хабарлауынша, оқиға салдарынан екі адам қаза тауып, төртеуі жарақат алған.
Жәбірленушілер ауруханаға жеткізілді. Құқық қорғау органдарының қызметкерлері атысты бастаған адамдарды іздестіруде. Оқиға орнына полиция күштері жеткізілді.
Марди-Граны мерекелеу маусымы Американың оңтүстік штаттарында шамамен бір аптаға созылады. Сол уақытта салтанатты шерулер өткізіліп, оны тамашалауға мыңдаған туристер жиналады. Бұл жолы өткен шараға 50 мыңға жуық адам келген.
