АҚШ-та ит иесіне еменнің түбінен 10 млн.доллардың қазынасын тауып берді (ФОТО)

АСТАНА. ҚазАқпарат - Солтүстік Калифорнияда (АҚШ) ерлі-зайыпты итімен серуендеп жүріп, мол байлыққа кенелді, деп жазады «МиллиардерЪ» журналы.

Ерлі-зайыптылар итінің кәрі емен түбін қаза бастағанын көріп, жақындайды. Ит тынбастан қазып, 1427 дана алтын тиындар салынған ыдысты табады.

«Бұл - шамамен 10 миллион доллар көлеміндегі байлық. Барлық тиындар жақсы сақталған, онда 1847-1894 жылдар деп көрсетілген», деп жазады басылым.

Дереккөздің жазуынша, табылған алтын тиындар тіпті, айналымға түспеген, банктен жаңа сатып алынған күйінде жасырылған секілді. Тиындардың түпнұсқа екенін «Professional Coin Grading Service» мамандары растады.

Әр монетаның құны шамамен 27 000 долларды құрайды. Бағасы 1 миллионға дейін жететін сирек даналары да кездеседі.

Қазынаға қарық болған жұп есімдерін құпия ұстауды жөн көрді. Олар монетаны Amazon сайты арқылы сатылымға шығармақ ниетте.