АҚШ-та Обаманы өлтіремін деп қоқан-лоқы жасаған азамат тұтқындалды

ВАШИНГТОН. Қаңтардың 17-сі. ҚазАқпарат - АҚШ-та елдің жаңадан сайланған президенті Барак Обаманы өлтіремін деп қоқан-лоқы жасаған азамат тұтқындалды. Висконсия тұрғыны 42 жастағы Стивен Джозеф Кристоферді мемлекеттің бірінші тұлғаларын қорғаумен айналысатын Құпия қызметтің агенттері Миссисипи штатында ұстаған.

Билік оған жаңадан сайланған ел президентіне қастандық жасаймын деген қоқан-лоқы көрсеткен деп айып тағып отыр. Прокурорлардың айтуынша, тұтқындалған азамат өз қоқан-лоқысын интернет арқылы жария еткен. Қаңтардың 11-і және 15-і күндері ол интернет-сайттардың бірінде «Барак Обаманы өлтіру туралы шешім қабылдағаны» туралы хабарлама қалдырады. Оның айтуынша, бұл «елдің игілігі үшін» керек көрінеді.