Ақсу энергетиктері электр энергиясын өндіру жоспарын асыра орындады
ПАВЛОДАР. ҚазАқпарат - Қаңтар айында «Еуразиялық энергетикалық бірлестігі» АҚ-ның Ақсу электр стансасының ұжымы 1 млрд 422 млн-нан астам кВт/сағ энергия өндірді. Бұл жоспардан 32,7 млн кВт/сағ артық болып шықты, деп хабарлады кәсіпорынның баспасөз қызметі.
Өндіріс көлемінің ұлғаюы электр энергиясын тұтынушылар сұранысының артуына байланысты болды. Олардың арасында «Қазхром» ТҰК» АҚ, Қазақстан электролиз зауыты, Соколов-Сарыбай тау-кен байыту өндірістік бірлестігі сияқты Қазақстанның ірі өнеркәсіп кәсіпорындары бар.
Еске сала кетейік, Ақсу электр стансасында 2001 жылдан бастап энергиялық блоктарды қалпына келтіру жұмыстары сәтті жүргізілді; 8 блоктың бесеуі кешенді жаңғыртылды. Қазіргі уақытта құны 277 млн доллар №5 энергиялық блокты қалпына келтіру жұмыстары басталды.
«ЕЭБ» АҚ-ы 1996 жылдан бері жөндеу жұмыстары мен электр стансасы жабдықтарының қалпына келтірілуіне 190 млрд-тан астам теңге жұмсаған.
Ақсу электр стансасының өндіру қуаттылығы - 2450 МВт.
