Ақтауда бір топ үлескер аймақ басшысынан көмек сұрап, әкімдікке барды
АҚТАУ. KAZINFORM — 70ке жуық тұрғын «Grand Avenue — 2» тұрғын үй кешенінен баспана алу үшін әр қайсысы 20 миллионнан 45 миллион теңгеге дейін қаражат төлеген. Құрылыс жұмыстары 2021-жылы басталған.
Айтуларынша, пәтер кілттері былтыр берілуі тиіс екен, алайда құрылыс тоқтап қалған.
Баспанаға қол жеткізе алмай, болмаса қаражатын қайтара алмай жүрген тұрғындар Маңғыстау облыстық әкімдігіне жиналды.
— Қанша жыл өтті. Құрылыс деп 3 жыл күттік. Енді міне, 1 жылдан бері қозғалыс жоқ. Сотқа беріп, жеңдік. Бірақ одан нәтиже болмай тұр. Ақшамызды өндіре алмай отырмыз, — дейді Жаңаөзен қаласының тұрғыны Ринат Қайыржан.
Әкімдіктегілер құрылыстың әуел баста-ақ, заңсыз басталғанын айтады. Сондықтан сотқа шағым түсірілген.
— Құрылыс компаниясы тұрғын үй құрылысын рұқсатсыз бастап кеткен. Ешқандай құжатсыз, сараптамасыз, жұмыс жобасы да жоқ. Сондықтан әкімшілік жауапкершілікке тартылды. Сот құрылысты бұзуға шешім шығарды, — дейді облыстық мемлекеттік сәулет-құрылыс бақылауы басқармасы басшысының орынбасары Алғадай Қоштаев.
Ал құрылыс компаниясының өкілі Олжас Мұратовтың айтуынша, құзырлы мемлекеттік органмен медиативтік келісім жасалып, тұрғын үй құрылысын жалғастыруға рұқсат берілген.
— Құрылысты жалғастыру үшін КазНИИСА-дан рұқсат алуымыз керек болды. Оған 6 айдай уақыт кетті. Соның салдарынан құрылыс жұмыстары тұрып қалды. Тұрғындардың қаражатын құрылысқа жұмсадық. Біз қашпаймыз, ашық жиналыстар өткізіп жүрміз. Тағы да диалог жасауға дайынбыз. Кілттерін береміз. — дейді «Garden group building» ЖШС-нің өкілі Олжас Мұратов.
Құрылыс компаниясының өкілі қаржылық қиындықтар барын жасырмады. Десе де, келесі жылдың бірінші тоқсанында аталған тұрғын үйдің құрылысын аяқтауға уәде берді.
Бұған дейін, Маңғыстауда білім саласында 800-ден астам адамның жауапкершілікке тартылғаны туралы жазған болатынбыз
