Ақтауда мердігер жаңа құбырдың орнына ескі, тот басқан құбыр салмақ болған
АҚТАУ. KAZINFORM — Мердігер су құбырын жаңарту жұмыстары кезінде ескі құбырларды жаңасына ауыстырудың орнына, қайтадан тот басқан құбырлар қоймақ болған.
Бұл жағдайды тұрғындар байқап, жергілікті билікке шағым түсірді. Соның негізінде құзырлы орган тексеріс жүргізген.
Маңғыстау облыстық мемлекеттік сәулет-құрылыс бақылауы басқармасының басшысы Даурен Өтепқалидің айтуынша, тексерудің нәтижесінде бірқатар заңбұзушылық анықталған.
— Ақтау қалалық құрылыс бөлімінен 8 және 15 шағын аудандарында жүргізілген су құбырын жаңарту жұмыстары бойынша, құрылыс қалдықтарының тазаланбауы, рұқсатсыз қазу жұмыстары, сапасыз материалдар қолдану сияқты заң бұзушылықтар анықталғаны жөнінде хат келді. Осы аталған деректер дәлелденіп, мердігерге ҚР Әкімшілік қылмыстық Кодексінің 309 және 312-баптары бойынша айыппұл салынып, бюджетке өндірілді, — дейді басқарма басшысы.
Айта кетейік, ҚР Әкімшілік қылмыстық Кодекстің 309-бабы — Құрылыс және жөндеу жұмыстары кезінде аумақты зақымдау бойынша айыппұл мөлшері жеке тұлғаларға — 35 320 тг, шағын бизнеске — 58 980 тг, орта бизнеске — 98 300 тг, ірі бизнеске — 393 200 тг. Ал, 312-бап — Құрылыс заңнамасын бұзу бойынша айыппұл шағын бизнеске — 786 400 тг, орта бизнеске — 1 572 800 тг, ірі бизнеске — 2 752 400 тг.
— Ал, егер мердігер компания бір жыл ішінде тағы да осындай заңбұзушылықтарды қайталаса, оның құрылыс жүргізу туралы лицензиясын кері қайтару мәселесі сотта қаралады, — дейді басқарма басшысы.
Бұған дейін, Ақтауда құбыр жарылып, тұрғындар ауыз сусыз қалғаны туралы жазған болатынбыз.
