Ақтауда өрт қауіпсіздігін сақтамағандарға 900 мың теңгеге жуық айыппұл салынды
АҚТАУ. ҚазАқпарат – Ақтауда жаз басталғалы өрт қауіпсіздігін сақтамаған 7 адамға 897 000 теңге айыппұл салынған. Оның ішінде 1 заңды тұлғаға 690 000 теңге және 6 жеке тұлға 207 000 теңге айыппұл арқалаған. Бұл туралы Маңғыстау облыстық Төтенше жағдайлар департаментінің баспасөз қызметінен мәлім етті, деп хабарлайды ҚазАқпарат тілшісі.
Жыл басынан бері Ақтау қаласындағы қоқыс контейнерлерін, мекемелер мен құрылыс нысандары аумағында қоқыс қалдықтарын өртеу деректері көп тіркелген. Сондай-ақ, өрт сөндіру техникаларының көмегіне жүгіну жиілеп кеткен.
«Биылғы жаз маусымы басталғалы мамандар ҚР «Әкімшілік құқық бұзушылықтар туралы» кодексінің 336-бабы негізінде 7 адамға 897 000 тг айыппұл, оның ішінде 1 заңды тұлғаға 690 000 тг және 6 жеке тұлға атына 207 000 тг айыппұл салған. Маусымда дала алқаптарында өрт шығу деректері жиілеп кетті. Мұның себебі – негізінен азаматтардың жаз айларында қауіпті елемей, немқұрайлық танытуы», - делінген баспасөз мәліметінде.
