Ақтауда Президент Телерадиокешенінің «Хроникадан болашаққа» атты кинолекторийі өтті
АҚТАУ.KAZINFORM - Маңғыстау облысының орталығында көрерменге «Тамшы» деректі филімі ұсынылды. Бұл – Каспий теңізі мен оның бірегей эндемикалық түрі – Каспий итбалығын сақтап қалу үшін өз күшімен күрескен еріктілер ерлігін баяндайтын картина.
«Тамшы» фильмі Президент Қасым-Жомарт Тоқаевтың бастамасымен БҰҰ жариялаған Халықаралық еріктілер жылы аясында түсірілді. Облыстық мәслихаттың тұрақты комиссиясының төрағасы Мақсат Рзаханов мұндай жобалардың маңызын атап өтті.
Оның айтуынша, деректі фильм көрерменге елдегі маңызды оқиғаларды жаңа көзқараспен көруге мүмкіндік береді.
Фильмнің басты кейіпкерлері, Маңғыстау облысынан шыққан еріктілер Данияр Әкімжанов пен Бақытгүл Өмірханқызы да көрсетілімге қатысты. Ақтау тұрғындары Телерадиокешен кинолекторийінің арқасында олармен жеке кездесу мүмкіндігіне ие болды.
Данияр Каспий теңізінің жағасындағы Баутино ауылында дүниеге келген. Оның балалық шағы теңізбен, оның тұзды иісімен және толқындарының дыбысымен байланысты болды.
– Каспий теңізінің қазіргі жағдайы алаңдатарлық. «Біз оны қалай сақтап қала аламыз?» деген сұрақ мені үнемі толғандырады. Біз бұл мәселе бойынша құзырлы органдармен жұмыс істейміз. Біз табиғат жаратқан барлық нәрсеге қамқорлық жасауымыз керек. Теңіз тіршілігін, құстар және басқа да жануарларды қорғау – біздің ортақ мақсатымыз. Каспий экожүйесін сақтау үшін біз жағалауда сенбілік өткізіп, теңіз түбін қоқыстардан тазартамыз. Тіпті аралдарда экологиялық науқандар ұйымдастырамыз, - дейді ерікті.
«Эколидер» еріктілер клубының жетекшісі, тәуелсіз эколог және ерікті Бақытгүл Өмірханқызы жастармен бірге жағалауды тазалауға, итбалықтарды қорғауға және қоршаған ортаны зерттеуге қатысады. Оның бастамасымен клуб мүшелері Қаракөл көліндегі аққулар мен фламинголарды бақылап, санап, судың құрамын зерттейді.
– Мен ерікті болуды мақсат еткен жоқпын. Мұны жүрек қалауы деп атауға болады. Бұл – менің табиғатым. Қазақстан таза болуы керек. Қайда барсам да, тазалықты насихаттауға және балаларға да соны үйретуге тырысамын, - дейді Бақытгүл Өмірханқызы.
Белсенділер бастамасы қазір қолдауға ие болды. Конституцияның өзі еріктілер қызметін қолдайды.
– Біз бұл фильмді не үшін түсірдік? Биыл Президент Қасым-Жомарт Тоқаевтың бастамасымен БҰҰ бүкіл әлемде еріктілер жылын жариялады. Дәл осы тұрғыда біз фильмді Каспий теңізін сақтауға жанқиярлықпен көмектескен адамдарға арнадық. Бұл нақты адамдар туралы ғана емес, азаматтық жауапкершілік пен адамгершілік ұлттық идеяның бір бөлігіне айналып келе жатқанының дәлелі, - деді ҚР Президенті телерадиокешенінің деректі фильмдер орталығының бас продюсері Әділбек Құламан.
Фильм атауының өзі терең мағынаға ие. Бір тамшы теңіз суы кішкентай әрі маңызды емес болып көрінуі мүмкін. Бірақ мыңдаған тамшыдан теңіз құралады. Сол сияқты еріктілердің әрбір әрекеті, бастамасы Каспий теңізін қорғауға бағытталған жалпы күш-жігердің бір бөлігіне айналады.
«Тамшы» ешкімді бейжай қалдырмады. Көрсетілімнен кейін көрермендер фильмде еріктілердің Каспий теңізінің мәселесіне және олардың табиғат алдындағы жауапкершілігіне деген көзқарасы шынайы әрі нақты бейнеленгенін атап өтті.
- Фильм маған үлкен әсер қалдырды. Каспий теңізінің жағдайы, итбалықтардың тағдыры және оларға қамқорлық жасайтын еріктілердің жұмысы мені ойландырды. Кейде тіпті кішкентай әрекеттің де табиғатты қорғауға үлкен үлес қоса алатынын түсінеді екенсің, - деді Ақтау тұрғыны Назжан Сәрсенбай.
ТРК кинолекторийі бағдарламасына енгізілген екінші фильм Aral болды. Бұл қарт балықшы Күнтуған Тұрғынбаевтың өмірі Арал теңізімен және балық шаруашылығымен тығыз байланысты болғаны туралы. Президентіміздің қолдауының арқасында Арал теңізі біртіндеп қалпына келіп жатыр.
Естеріңізге сала кетейік, «Хроникадан болашаққа» атты ауқымды ұлттық кинолекторий Қазақстан Республикасы Президенті Телерадиокешенінің 30 жылдығына орай өткізіліп жатыр. 21 мамырда Астанада басталған бұл ірі ағартушылық жоба Қызылорда, Түркістан, Шымкент және Тараз қалаларында көрсетілді.
Қазір ол Ақтау, Атырау, Орал және Ақтөбе қалаларын қамтитын батыс бағытын ашты.
Ақтаудан кейін ТРК кинолекторийі Атырау, Орал, Ақтөбе, Өскемен, Семей, Павлодар, Петропавл, Қостанай, Жезқазған, Қарағанды, Көкшетау, Талдықорған және Қонаев қалаларында өтеді. Жоба 25 қыркүйекте Алматыда аяқталады.
Фильмге кіру тегін.
