00:07, 04 Мамыр 2019 | GMT +6
Ақтауда Ұлттық ұлан жауынгерлері жоғалған 10 жасар қызды тапты
АҚТАУ. ҚазАқпарат - Ақтауда Ұлттық ұлан жауынгерлері жоғалған 10 жасар қызды тапты, деп хабарлайды ҚазАқпарат тілшісі.
«Батыс» өңірлік қолбасшылығының баспасөз қызметінен түскен мәліметке қарағанда, оқиға 2 мамыр күні сағат 21.00 шамасында 3-шағынауданда болды.
Ер адам қызын өз бетімен іздеп-табуға әрекеттенген. Бірақ күн батып бара жатқан соң, жауынгерлік топтар бойынша кезекші, аға лейтенант Ринат Әдіковке хабарласқан.
Қыз баланың жоғалғаны жөнінде бағыт-бағдар сол бойда жедел басқару орталығына берілген. Оны іздеуге жеке құрам түгелдей жұмылдырылған. 40 минуттан кейін Р.Әдіков пен қатардағы жауынгер Абай Санаев қызды №48 үйдің жанынан тапты.
Таяу маңдағы полиция пунктіне жеткізілген қыз ата-анасымен аман-есен қауышты.
6656-әскери бөлім командирі қырағылық көрсетіп, өз міндеттерін адал орындаған жауынгерлерді ынталандырды.