Ақтауға Ресейден чартерлік рейспен алғашқы туристер келді
АҚТАУ. ҚазАқпарат - Ақтау халықаралық әуежайына Ресейден 100-ден астам жолаушы ұшып келді, деп хабарлайды ҚазАқпарат тілшісі.
Ақтау іргесіндегі «Rixos Water World Aktau» қонақ үйі мен ресейлік «Anex tour» туроператоры келісім жасап, 2 жылдан бері тұрақты жұмыс істеп келеді. Келісім аясында бүгін Ақтауға Екатеринбург қаласынан 100-ден астам саяхатшы сапарлап келді. Туристер 197 туристік бағыт бойынша түбектің тұмса табиғатын тамашалайды.
«Біз Қазақстан туризмін дамыту үшін жұмыс істеп жатырмыз. Алдағы уақытта мұндай чартерлік рейстер қайталанатын болады» - деді туроператордың өкілі Кан Челик.
Ал саяхатшы Марина Есенецкая бұл сапардан есте қаларлық сәттерді күтетінін айтады.
«Бұл менің Ақтауға алғаш рет келуім. Жолда 2 сағат ұшып келдік. Барлығы керемет. Бір апта демалысты жоспарладық. Алдағы күндері күн жылы болады. Табиғатты тамашалаудан керемет әсер аламын деп ойлаймын» - дейді турист.
Айта кетейік, таяуда Ираннан чартерлік рейспен туристердің алғашқы легі өңірге саяхаттап келді. Алдағы уақытта чартерлік рейспен Ақтауға қатынайтын туристердің қатары көбейетін болады.
