Ақтөбе, Батыс Қазақстан, Қарағанды мен Қызылорда облыстарында өндіріс төмендеген
АСТАНА. ҚазАқпарат – Биылғы қаңтар-маусымда Қазақстанда өнеркәсіп өндірісінің индексі 103,8% болды. Алты ай ішінде 22 611,9 млрд теңгенің өнеркәсіп өнімі өндірілген, деп хабарлайды ҚазАқпарат Ұлттық статистика бюросына сілтеме жасап.
Оның ішінде кен өндіру саласында – 10 490,2 млрд теңгеге (жалпы көлемнен 46,4%), өңдеу саласында – 10 587,6 млрд теңгеге (46,8%).
Өндірістің өсуі тау-кен өндіру өнеркәсібі және карьерлерді қазуда байқалды – 3,7%, өңдеу өнеркәсібінде – 3,4%, электр энергиясымен, газбен, бумен, ыстық сумен және ауаны кондициялаумен жабдықтауда – 6,8%, сумен жабдықтау, қалдықтарды жинау, өңдеу және жою, ластануды жою бойынша қызметте – 6,4%.
Өңірлер арасында айтарлықтай өсім Ақмола, Солтүстік Қазақстан, Жетісу, Абай, Алматы облыстарында және Алматы қаласында тіркелді.
Шикі мұнайды (105,6%), табиғи газды (102,5%), темірді қоспағанда, кенді (102,9%), өзге де пайдалы қазбаларды (117,4%) өндіру салаларының артуына байланысты 2023 жылғы қаңтар-маусымда тау-кен өндіру өнеркәсібі және карьерлерді қазуда өнеркәсіп өндірісінің индексі 103,7% болды.
Өңдеу өнеркәсібінде былтырғы бірінші жарты жылмен салыстырғанда есепті кезеңдегі өнеркәсіп өндірісінің индексі – 103,4%. Өсім тамақ өнімдері – 5,3%, сусындар – 6,6%, өңделген мұнай өнімдері – 2,8%, резеңке және пластмасс бұйымдары – 7,8%, өзге де бейметалл минералды өнімдер – 2,7%, машиналар мен жабдықтардан басқа дайын металл бұйымдарын өндіруде – 9,5%, машина жасауда – 28,8% белгіленді.
Өндіріс көлемінің өсуі республиканың 16 өңірінде тіркелді, төмендеу Ақтөбе, Батыс Қазақстан, Қарағанды, Қызылорда облыстарында байқалды.
