Ақтөбе облысында жергілікті жолдардың 600-ден астам шақырымы жөнделеді
АҚТӨБЕ. ҚазАқпарат - Қазақстан өңірлерінде облыстық және аудандық маңызы бар автомобиль жолдарын жаңғырту жұмыстары жалғасуда. Ақтөбе облысында осы жылдың соңына дейін жолшылар жолдардың 606 шақырымын жаңартпақ.
Бұл туралы ҚР Индустрия және инфрақұрылымдық даму министрлігінің баспасөз қызметі хабарлады.
Баспасөз мәліметтеріне қарағанда, биыл мұнда автомобиль жолдары саласында 41 жоба жүзеге асырылып жатыр. Олардың екеуі - жолдарды салу, үшеуі – жолдарды қайта жаңарту, төртеуі – жолдарды күрделі жөндеу, 33-і – жолдарды орташа жөндеу жобалары.
Айта кету керек, Ақтөбе облысында жақсы және қанағаттанарлық жағдайдағы жергілікті жолдардың үлесі 56,5 % құрайды. Жыл соңында аталмыш көрсеткіш 59% дейін ұлғайтылып, жақсы және қанағаттанарлық жағдайдағы жергілікті автомобиль жолдарының ұзындығы 2,9 мың шақырымды құрайтын болады.
Еске салайық, өңірдегі жергілікті жолдардың жалпы ұзындығы 4,9 мың шақырымды құрайды. Олардың 1,2 шақырымы - облыстық, 3,7 шақырымы – аудандық жолдар.
Бұдан бөлек, аймақта республикалық маңызы бар жолдарды салу, қайта жаңарту, жөндеу жобалары жүзеге асырылуда.
Тиісті жұмыстар мен жолдардың 296 шақырымы қамтылатын болады.
