Ақтөбеде үйлену тойына дейін пәктікті сақтауға тәлім-тәрбие беретін келіндер клубы ашылды - республикалық басылымдарға шолу

***

«2012 жылдың 5 қыркүйегінде Бүкіләлемдік экономикалық фо­румның (БЭФ) Әлем елдерінің жаһандық бәсекеге қабілеттілігі туралы (The Global Competi­ti­ve­ness Index 2012-2013) есебі жа­рия­ланған болатын. Жаңар­тыл­ған рейтингке сәйкес, Қазақстан өзінің позициясын 21 пунктке жақсартып, 72-ші орыннан 51-ші орынға көтерілді. Қазақстанның мұндай жоғары көрсеткіші - бұл Мемлекет басшысының саяси бағытын табысты жүзеге асы­ру­дың нәтижесі екені күмәнсіз. Осылайша біздің респуб­ли­ка­мыз әлемнің бәсекеге барын­ша қабілетті 50 елінің қатарына ену туралы алға қойылған міндетті жүзеге асыруға айтарлық­тай жақындай түсті»,-деп жазады  «Егемен Қазақстан» басылымы бүгінгі санында. Даму үдерісі тұрғысындағы мәселелерді көтерген бұл мақала  «Бұл - Елбасы бағытын табысты жүзеге асырудың нәтижесі» деген тақырыппен берілді.

Сондай-ақ осы басылымның бүгінгі санында кеше Қайрат Мәмидің төрағалық етуімен Парламент Се­наты­ның бюро отырысы болғаны баяндалады. Онда Мәжілісте мақұлданған заң жобалары Сенаттың тұрақты комитеттері мен палата Аппаратына бөлініп берілді. Бюрода «Микроқаржы ұйым­да­ры ту­ра­лы» және «Қазақстан Рес­публика­сы­ның кейбір заңнамалық актілеріне микроқаржы ұйым­дары­ның қызметі мәселелері бойын­ша өзгерістер мен толықтырулар енгізу туралы» заң жобаларын одан әрі пысықтау үшін Қаржы және бюджет комитеті бас комитет болып белгіленді. «Еуразиялық экономикалық қо­ғам­дастыққа мүше мемлекеттердің ортақ сақтандыру нарығын құру туралы хат­таманы ратификациялау туралы» заң жобасы бойынша қорытынды әзірлеу де осы комитетке тапсырылды. «Қазақстан Республикасының Үкі­меті мен Австрия Республи­кас­ының Үкіметі ара­сындағы Инвес­тицияларды көтермелеу және өзара қорғау туралы келісімді ратификациялау туралы» заң жобасын одан әрі зерделеуге Экономикалық даму және кәсіпкерлік комитеті бас комитет болып белгіленді. Осы жайында «Бас комитеттер белгіленді» атты материалда жазылған.

  ***

«Айқын» басылымының жазуынша, Алматыдағы Достық үйінде «WikiBilim» қоғамдық қорының ұйымдастыруымен «Интер­нет желісінде қазақ тілді мазмұнды дамыту және насихаттау» деген тақырыпта семинар-тренинг бо­лып өтті. Жиынға Мәдениет және ақпарат министрлігіне қарасты Тіл комитетінің төрағасы Шерубай Құрманбайұлы, Алматы қалалық Тілдерді дамыту басқармасының бастығы Мамай Ахетов және қазақ­стандық блогерлер қатысып, интернетті қазақ тілінде сөйлету барысындағы қол жеткен жетістіктермен қоса, алдағы уақытта атқарылуы тиісті мәселелерді тілге тиек етті. Жиынды ашқан «WikiBilim» қоғамдық қорының президенті Рауан Кенжаханұлы қа­зіргі күні елімізде интернет желісін қолдану­шы­лардың жыл санап артып келе жатқанын қуанышпен жеткізді. Десек те, интернет же­лісінде қазақ тілді мазмұнды дамыту мен наси­хаттаудың бүгінгі күні өзекті де өткір мәселеге айналып отырға­нын жасырмады. Бұл мәселе жөнінде «Айқын» басылымының бүгінгі санындағы «Интернетті қазақ тілінде сөйлету керек» атты мақалада кеңірек жазылған.

 «Ақжүрек ақшаға сатылмайды»,- деп жазады «Айқын» басылымы бүгінгі санында. Басылымның жазуынша, Спорттық бәсекелер барысында түрлі қызықты оқиғалардың орын алатыны белгілі. Мәселен, жуырда ғана Лондонда өткен Олимпиада ойындарында еркін күрестен Қазақстанның ұлттық құрама командасының мүшесі Ақжүрек Таңатаров бірқатар келеңсіз жайттарды басынан өткерді. «Лон­дондағы жарыстың бастапқы бәсекелерінің бірінде қар­сыласының бапкері Таңатаровтың қасына келіп: «Егер менің шә­кіртімнен ұтылсаң, 100 мың АҚШ долларын беремін», - деген екен. Ақжүрек бұл уәдеге иланбады. Қандасымыз: «Бұ­ларың жарамайды жігіттер. Мен өзге елдің емес, өз елімнің намысын қорғап жүрмін. Артымда қалың елім қазағым тұр. Бүкіл халық тілеуімді тілеуде. Жүздеген мың жанкүйер жеңіс күтеді. Олай болса, менің жеңілуге қақым жоқ», - деп жауап қайырды. Арамза ниеттерін жүзе­ге асырмақ болған пысықайлар «сыйақы» мөлшерін көбейтіп те көрді. Бірақ Ақжүрек ақшаға са­тылған жоқ. Жоспары жүзеге аспаған бап­кер кері қайтты»,-делінген газетте.

***

«Алаш айнасы» басылымы бүгінгі санында «Жаратылысқа жат құбылыс қайдан келді?», - деген тақырыппен мақала басты. Жаратылыс заңы бойынша адам екіге бөлінеді - еркек, әйел. Үшіншісі берілмеген. Алайда соңғы уақытта адамның қай жыныстық тобына да жатқызуға келмейтін үшінші топ пайда болды. Оларды кім деп айтуды да білмейсің. Мұндай топтар ең алдымен «өркениеті дамыған» деген Еуропа елдерінде пайда болып, ақырын-ақырын қанат жайып, бүгінде бізге де жетті. Еуропалықтар оларға «гейлер», «лесбиянкалар» деп ат та беріп қойған. «Мұндай құбылыс түптің түбінде адамзаттың құрып кетуіне әкеліп соқтырады» дейді мамандар.

***

«Время» басылымының жазуынша, Ақтөбеде келіндердің клубы ашылған екен, онда жас ұрпаққа тәлім-тәрбие беру негіздеріне басымдық берілмек. Осында қыздарды бірінші кезекте неке қиғанша ар мен тазалықты сақтау бойынша үйрететін көрінеді. Ақтөбелік отбасын жоспарлау орталығымен бірлесе аталған клубты ашуға бастамашы болған облыстағы белгілі қоғам қайраткері Зияш Салменнің айтуынша, онда ана болу, аурулардың алдын алу, сондай-ақ ең бастысы үйлену тойына дейін пәктігін сақтау бойынша тәлім-тәрбиелік дәрістер оқытылады.