Ақтөбеде жүргізушілер тасымалдау қызметін тегін атқарып жүр
АҚТӨБЕ. KAZINFORM — Ақтөбеде ГАЗель жүргізушілері гуманитарлық көмек орталықтарындағы жүкті тегін тасымалдап жүр.
Су тасқыны басталған сәттен-ақ гуманитарлық көмек орталықтары ашылып, оларға алдымен өңірдегі ГАЗель жүргізушілері қолұшын созды.
Еріктілер мен гуманитарлық орталық мамандары, жүк тасымалдау көлігінің иелері ортақ чатта отырып, бар ұйымдастыру жұмыстарында белсенділік танытты.
Хабарлама түскен сәтте-ақ көмекке келетін олар аудан, ауылдарға да барды.
— Еріктілер жеткізілген жүкті қабылдап, сұрыптап, тиеуге дайындап қояды. Әкімдік кестесі бойынша аудандарға тікұшақпен де, ГАЗельмен де жүк жібердік. Бүгінге дейін 40-50 ГАЗель жүк тасымалданды. Көлік иелері ақша сұрамады, жанар-жағармай қайда демеді. «Ойыл ауданына 4 ГАЗель керек» деп жазамыз, өздері келеді. Фотоға түсіреміз, олар апарып тапсырады. Сонымен бірге жеңіл көлік иелері де сондай қызмет атқарып жүр, — деді Ақтөбе облысы әкімі аппараты басшысының орынбасары Ләззат Оразбаева.
Айта кетейік, бүгін Ақтөбеге әнші Димаш Құдайберген келіп, № 40 орта мектептегі эвакуациялық пунктке барды. Онда тұрғындармен кездесті.
Сонымен бірге гуманитарлық көмек орталығындағы жұмыспен танысты. Мұнда еріктілер күні-түні жұмыс істеп жүр.
