Ақтөбедегі тікұшақ апаты. Аман қалған екі әскеридің қазіргі жағдайы қалай

АСТАНА. KAZINFORM — Ақтөбе облысының Денсаулық сақтау басқармасы тікұшақ апатынан зардап шеккен әскери қызметкерлердің қазіргі жағдайын баяндап берді.

— Тікұшақтың апатты қонуы салдарынан зардап шеккен ӘҚК Әскери институты авиациялық эскадрилья тікұшағының командирі Бейбарыс Ибраев пен ӘҚК Әскери институты оқу-жаттығу авиациялық орталығының аға ұшқыш-инструкторы, аға лейтенант Рүстем Нигметовтің жағдайы жақсарып, ауруханадан шығарылды. Олар амбулаториялық бақылауда болады, — делінген басқарма хабарламасында.

Еске салсақ, 9 қарашада Ақтөбе облысы Мәртөк ауданы аумағында тікұшақ апатқа ұшырап, жанып кетті.

Бортта үш адам болған. Оның біреуі оқиға орнында көз жұмды.

Кейіннен Ақтөбеде тікұшақ апатына байланысты қылмыстық іс қозғалды.

Сонымен қатар, Ақтөбе облысының әкімдігі Мәртөк ауданы Сарыжар ауылы маңында болған тікұшақ апатынан зардап шеккендерге көмек көрсететінін мәлім етті.

Бұған дейін Қорғаныс министрінің орынбасары Ақтөбе облысында тікұшақ апатына қатысты түсінік берді.