Ақтөбелік саяхатшы өзі құрастырған күн көлігімен ел аралап жүр
ҚАРАҒАНДЫ. ҚазАқпарат – Ақтөбелік Владимир Силевич күннен қуат алатын көлік құрастырып, Қазақстан бойынша саяхатқа шыққан. Ол бүгін Қарағанды қаласында, деп хабарлайды ҚазАқпарат облыс әкімдігіне сілтеме жасап.
Ақтөбелік Владимир Силевич мамандығы бойынша инженер-электроник. Техникаға бала кезінен әуес. Күн көлігін жасауға оны күн сәулесінен қуат алатын техникамен жарыс ұйымдастырушы блогер шабыттандырған. МАNТАNА деп атаған машинасын жасауға 2 ай және 2 миллион теңге қажет болды.
«Үш доңғалақты дизайн, алдыңғы екеуі бұрылыстарда тұрақтылықты қамтамасыз етеді. Жақтауы профильді құбырлардан жасалған. Электр қозғалтқыш Қытайдан, күн панельдері Ресейден жеткізілген. Тізбекті жетек жетекші дөңгелегіне өтеді», - дейді дизайнер.
Маусым айында өткен күн көліктері жарысында ақтөбелік құрастырушы 2-орынды иеленді. Жарысқа Ресей мен Қазақстаннан 10 белсенді конструктор қатысқан. Бағыт 2 700 км болды. Старт Оралда берілді, үш аптадан кейін Алматыда мәресіне жетті. Орта есеппен қатысушылар күніне 150-200 км орташа жылдамдықпен 40-45 км/сағ жүріп өтті.
Владимир Силевич Ақтөбеге қайтып барады. Жол бойында әлеуметтік желідегі оқырмандарымен кездесіп, Қазақстанның көрікті жерлеріне соғуды жоспарлаған.
Айта кетсек, кездесу бүгін сағат 17:00-де Қарағанды қаласындағы Экомұражайда (Бұқар жырау даңғылы, 47) өтеді.
