Алаяқтар «Kolesа.kz» сайтына жалған хабарландырулар орналастырған
ТАРАЗ. ҚазАқпарат - Жамбыл облысында криминалистер интернет арқылы алаяқтық жасағандарды анықтады, деп хабарлайды ҚазАқпарат тілшісі Жамбыл облысы ІІД баспасөз қызметіне сілтеме жасап.
«Kolesа.kz» сайтында «Хундай» маркалы автомашинаның қозғалтқышын сатамын деген алаяқ В. есімді азаматшаны алдап, 270 мың теңгені С. есімді азаматтың «Қазкоммерцбанк» АҚ-тан ашқан карточкасына аудартқызған. Бірақ ҚР Ішкі істер министрлігінің мәлімттеріне сәйкес, аталған тұлға қайтыс болғандар тізімінде тұр. Картадағы ақша «Қазкомның» Қостанай қаласындағы банкоматтарынан алынған. Картаға бұдан тыс республиканың түрлі өңірлерінен 2 459 500 теңге мөлшерінде ақша түскен. Күдіктілер Қостанайда ұсталды, біреу арқылы картадан ақша шығарудың жеті фактісі анықталды», - дейді Жамбыл облысы ІІД баспасөз қызметінің басшысы Гүлсара Мұхтарқұлова.
Ведомство өкілдері ақпараттық технологиялар арқылы жасалған алаяқтық қылмыстарын ашу және тергеп-тексеру барысында туындаған мәселелерді шешу үшін қосымша ұйымдастыру-практикалық шаралар қолданылатынын айтты.
«Жамбыл облысы ІІД қылмыстық полиция басқармасы ақпараттық технологиялар арқылы жасалған алаяқтық қылмыстарын ашу және тергеп-тексеру барысында туындаған мәселелерді шешу үшін қосымша ұйымдастыру-практикалық шараларды қолданады. Интернет және компьютер технологияларын пайдалану арқылы жасалған алаяқтықтарға үнемі талдау жүргізіледі», - дейді баспасөз қызметінің өкілдері.
