Албанияда 3,7 млн-нан астам сайлаушы жаңа парламент құрамын анықтайды
АСТАНА. KAZINFORM — Жексенбі, 11 мамыр күні Албанияда жалпыұлттық парламенттік сайлау өтеді. Оған 3 713 761 тіркелген сайлаушы қатыса алады, деп хабарлайды Анадолы.
Орталық сайлау комиссиясының мәліметінше, 140 депутаттық мандатқа 53 саяси партия мен 3 коалиция өкілдері таласады. Бұл — 1991 жылы коммунистік режим құлағаннан бергі 11-ші парламенттік сайлау болмақ.
Бүгіннен бастап елде үгіт-насихатқа шектеу күшіне енді. Дауыс беру аяқталғанға дейін митинг өткізуге, бұқаралық ақпарат құралдарында насихат жүргізуге және кез келген саяси жарнамаға, оның ішінде телеарналардағы көрсетілімдерге тыйым салынған.
Сайлау күні таңғы 07:00–ден кешкі 19:00–ге дейін ел аумағындағы 5 225 сайлау учаскесінде дауыс беру өтеді.
Биыл алғаш рет шетелде тіркелген албаниялық сайлаушылар қашықтан — электрондық пошта немесе кәдімгі пошта арқылы дауыс бере алады. Бұл мүмкіндікті 245 935 азамат пайдаланады. Дауыс беру 15 сәуірде басталып, негізгі сайлау күнімен қатар, 11 мамырда аяқталады.
Сайлау барысын Еуропадағы қауіпсіздік және ынтымақтастық ұйымының (ЕҚЫҰ) 31 елден келген 100-ге жуық халықаралық бақылаушысы қадағалайды.
Негізгі бәсекелестер — социалистер мен демократтар
Қазіргі премьер-министр Эди Рама басқаратын билеуші Социалистік партия (СП) сауалнамаларда алда келеді. Оның басты қарсыласы — бұрынғы премьер Сали Бериша жетекшілік ететін Демократиялық партия (ДП), ол «Ұлы Албания альянсы» құрамында сайлауға түсіп жатыр (блок 25 партиядан тұрады).
Эди Рама Албанияның Еуропалық одаққа интеграциясын өзінің басты басымдығы деп атап өтті. Ол 2025 жылға дейін ЕО-мен келіссөздердің барлық тарауын аяқтап, 2030 жылға қарай толық мүшелікке қол жеткізуді уәде етті. Сонымен қатар, мемлекеттік қызметкерлердің жалақысын көтеру және әлеуметтік қызметтердің сапасын жақсарту да партия бағдарламасына енген.
Оппозициялық ДП әлеуметтік саясатты күшейтуді ұсынуда: зейнеткерлер мен аз қамтылған отбасыларға қаржылай көмек, салық, денсаулық сақтау және білім беру жүйесін реформалау жоспарлануда.
Төменгі шек пен этникалық әртүрлілік
Албанияда парламентке өту үшін партияға бар болғаны 1% дауыс жинау жеткілікті — бұл Еуропадағы ең төменгі межелердің бірі.
Ел халқы этникалық және діни тұрғыда алуан түрлі. Албандардан бөлек, мұнда македондар, гректер, черногорлар, влахтар, босниялықтар, сербтер, болгарлар, египеттіктер және сығандар (рома) тұрады.
Мұсылмандар ел халқының басым бөлігін құрайды, бірақ католиктер, православтар, бекташилер, протестанттар және өзге де діни қауымдар кеңінен
