Алдағы күндері елімізде күн салқындайды, тек батыста +33 градусқа дейін ыстық болады
АСТАНА. ҚазАқпарат - 22-24 қыркүйек күндері Иран аумағынан келетін ауа ағымы әсерінен Қазақстанның батыс облыстарында +25-33º аралығында жылы ауа райы сақталады, ол нормадан 7-10º жоғары.
Оңтүстікте жауын-шашынсыз. Бірақ солтүстік-батыстан ауа массалары келеді, сондықтан температура да төмен болады. Алдағы үш тәулікте температура көп жылғы орташа көрсеткішке жақын болады деп күтіледі.
Республиканың қалған аумағы бұрынғыдай Урал аумағынан жылжитын суық атмосфералық фронттар аясында болады. Мұнда кей жерлерде жауын-шашын түседі, түнде тұман болады. Кейін температура 0-ден төмен түседі.
