Алдағы жылы екі жол учаскесінде ақылы жүйені енгізу көзделіп отыр

АСТАНА. ҚазАқпарат - Қазақстанда 2020 жылға дейін 7 мың шақырымға тарта автожолдар ақылы болады. Бұл туралы бүгін Орталық коммуникациялар қызметіндегі баспасөз мәслихатында «ҚазАвтожол» ҰК Басқарма төрағасының орынбасары Ұлан Әліпов мәлім етті.

«Ақылы жолдар бойынша жоспарда біз 2020 жылға дейін республикадағы 7 мың шақырымға жуық жолдарды ақылы негізге өткізуді қарастырудамыз. Келесі жылы «Астана-Атбасар» және «Қызылорда-Шымкент» екі учаскеден бастаймыз»,-деді ол.

Ұ. Әліповтің сөзіне қарағанда, «Астана-Атбасар» жолында тек жүк көліктерінен ақы алынса, «Қызылорда -Шымкент» жолы барлық көлік түрлері үшін ақылы болады деп күтілуде.

«Бұдан ары қарай жолдардың құрылыстары аяқталған сайын ақылы тәртіп енгізіледі. Бұл - бюджетті жолды күтіп ұстау қаражатынан босатуға көзделген шаралар. Осы орайда «Астана-Бурабай» жолынан тиісті нәтижені көріп отырмыз, яғни жолды күтіп ұстау шығындары толықтай жабылып отыр»,-деді ол.

Ұ. Әліповтің айтуынша, «Астана-Бурабай» ақылы автобанында биыл 1 млрд. 129 млн. теңге жинау жоспарланып отыр.