Алдағы жылы Қазақстанда е-коммерция нарығының көлемі 3,6 млрд. долларға жетеді
АСТАНА. ҚазАқпарат - 2015 жылдың аяғына қарай Қазақстанда электронды коммерция нарығының ауқымы 3,6 млрд. АҚШ долларына жетуі ықтимал. Бұл туралы бүгін Астанадағы ақпараттық технологиялардың ASTEX-2014 Халықаралық көрме-конференциясында «Зерде» Ұлттық инфокоммуникациялық холдингі» АҚ Басқарма төрағасы Мирболат Аюпов мәлім етті.
«Болжамдар бойынша 2015 жылдың аяғына қарай электронды коммерция нарығының көлемі 3,6 млрд. долларға жетеді. Бұл өз кезегінде ритейлдің жалпы көлемінде 4 пайызды құрайды», - деді ол. Атап айтқанда, 2013 жылы Қазақстанда электронды коммерция нарығының көлемі 600 млн. долларға жуықтады. Осы көрсеткіш ритейлдің жалпы көлемінде 2 пайызға жуық.
