Алдын-ала мәліметтер бойынша, Шығыс Қазақстанда 1157 үйді су басқан, оның 536-ы - қалпына келтіруге жарамайды
ӨСКЕМЕН. Наурыздың 31-і. ҚазАқпарат /Людмила Малько/ - Нақтыланған мәліметтер бойынша, Шығыс Қазақстанда тасқын су төнген аумақтардан көшірілген адамдардың саны 7406 адамды құрады.
Қазіргі таңда 6007 адам үйлеріне оралды, деп хабарлады облыс әкімінің баспасөз қызметінен.
Апат аумағындағы жұмыстарға 356 техника мен жеке құрамның 247 адамы жұмылдырылып отыр. Алдын-ала мәліметтер бойынша, 1157 үйді су басқан, оның ішінде 536 үй - бұдан әрі тұруға жарамайды. Сондай-ақ, тасқын судың салдарынан 16 679 бас ұсақ мал, 2475 ірі қара мал, 556 жылқы қырылып қалды.
Бүгін аймаққа екікүндік жұмыс сапарымен бірінші вице-премьер Өмірзақ Шөкеевтің барғанын ҚазАқпарат бұдан бұрын хабарлаған болатын. Ө.Шөкеев өңірдегі тасқын судың жағдайын өз көзімен көру үшін Зайсан, Тарбағатай, Үржар, Зырян аудандарын, сондай-ақ бірқатар гидротехникалық нысандарды аралайды.
Ал ертең түстен кейін Өмірзақ Шөкеевтің қатысуымен Төтенше жағдайлар жөніндегі облыстық штабтың мәжілісі өтеді.
