Александр Бублик әлемдегі үздік 100 теннисшінің қатарына енді
НҰР-СҰЛТАН. ҚазАқпарат - Қазақстандық Александр Бублик бүгін жаңартылған рейтингте әлемдегі үздік 100 теннисшінің қатарына енді, деп хабарлайды ҚазАқпарат тілшісі.
А.Бублик бұрын 120-орында болса, бірден 21 сатыға көтерілді.
Сөйтіп 21 жасар теннисші 99-ракетка атанды. Ол осылайша спорттық жолындағы үздік көрсеткішіне (95) жақын қалды.
Биылдың өзінде үш бірдей челленджер турнирін ұтқан А.Бубликтің рейтингтегі орны осылайша жоғарылап келеді.
Қазақстанның бірінші ракеткасы Михаил Кукушкин 44-сатыда тұр.
Тағы бір қазақстандық Александр Недовесов бір саты кейін сырғыды, ол 187-орында.
Әйелдер арасында Юлия Путинцева 38-орнын сақтап қалды.
Зарина Дияс 107-ден 104-ке көтерілді. Елена Рыбакина 143-сатыда келеді.
Еске сала кетейік, бұдан бұрын А.Бубликтің Монтеррей турнирінің жеңімпазы атанғанын жазған болатынбыз.
