Александр Бублик алғаш рет ірі жарыстың жеңімпазы атанды

None
АСТАНА. ҚазАқпарат – Қазақстанның бірінші, әлемнің 48-ракеткасы Александр Бублик Галле (Германия) ATP 500 турнирінің жеңімпазы атанды, деп хабарлайды ҚазАқпарат тілшісі.

Қазақстандық теннисші финалда әлемнің 7-ракеткасы, ресейлік Андрей Рублевпен бас жүлдені сарапқа салды.

Осыған дейін А. Бублик жеті рет ATP жарыстарының финалына шығып, соның біреуінде ғана, өткен жылы Монпельеде жеңімпаз атанған еді. Оған қоса, ATP 500 деңгейінде финалға алғаш рет өтіп отыр.

Матчты брейкпен сәтті бастаған қазақстандық теннисші бірінші сетте сол басымдылығын сақтап қалды – 6:3.

Екінші партияда есеп 3:2 болған мезетте ресейлік спортшы брейк жасап кетті – 6:3.

Үшінші, шешуші сетті А.Бублик брейкпен бастады – 2:0. Ақыры матчқа доп бергенде, өз мүмкіндігін жіберген жоқ – 6:3.

Сағат жарымнан астам уақытқа созылған бәсеке барысында Бублик 21 эйс жасап, 6 брейк-пойнттың екеуін пайдаланды. Қарсыласы 11 эйс, 1 брейкпен көзге түсті.

Осылайша, Александр Бублик өз спорттық жолында алғаш рет ATP 500 додасының чемпионы атанды.

Еске сала кетейік, бұдан бұрын Александр Бубликтің Германиядағы жарыстың финалына шыққанын жазған болатынбыз.

Сондай-ақ, Александр Бублик Германиядағы турнирдің финалына шыққаннан кейін өте бақытты екендігін жеткізді.

Ал, Бейбіт Жұқаев Истбурн турнирінің іріктеу сатысын сәтті бастады.


Соңғы жаңалықтар