Әлемде азық-түлік бағасы үшінші ай қатарынан қымбаттап жатыр
АСТАНА. KAZINFORM — Әлемдік азық-түлік бағасы қатарынан үшінші ай өсіп жатыр. Бұған энергия тасымалдаушылары құнының қымбаттауы мен Таяу Шығыстағы қақтығысқа байланысты жеткізу тізбегіндегі іркіліс әсер етіп жатыр, деп хабарлайды Азертадж.
Бұл туралы БҰҰ-ның Біріккен Ұлттар Ұйымының Азық-түлік және ауыл шаруашылығы ұйымы жариялаған соңғы есепте айтылған.
Негізгі азық-түлік тауарларының халықаралық бағасын бақылайтын Азық-түлік және ауыл шаруашылығы ұйымының азық-түлік бағалары индексі сәуір айында 130,7 тармақ болды. Бұл наурыз айындағы қайта қаралған көрсеткіштен 1,6 пайызға, ал өткен жылдың сәйкес кезеңімен салыстырғанда 2 пайызға жоғары.
Дәнді дақылдар бағасы наурызбен салыстырғанда 0,8 пайызға, жылдық есепте 0,4 пайызға өсті. Өсім құмай мен арпадан басқа негізгі дақылдардың көпшілігін қамтыды.
Әлемдік бидай бағасы АҚШ-тың кейбір өңірлеріндегі құрғақшылыққа және Аустралияда жауын-шашын мөлшерінің қалыптан төмен болуы мүмкін деген алаңдаушылыққа байланысты 0,8 пайызға қымбаттады.
Сонымен қатар фермерлердің тыңайтқышты аз қажет ететін дақылдарға көшуі салдарынан 2026 жылы бидай егісінің қысқаруы мүмкін деген болжамдар да бағаға қысым жасады. Тыңайтқыш бағасының өсуіне энергия құнының қымбаттауы мен Ормуз бұғазының іс жүзінде жабылуынан кейінгі жеткізу тізбегіндегі бұзылулар себеп болған.
Жүгерінің әлемдік бағасы 0,7 пайызға өсті. Бұған маусымдық ұсыныстың азаюы, Бразилиядағы ауа райы тәуекелдері және АҚШ-тың кейбір өңірлеріндегі егіс кезіндегі құрғақшылық әсер етті. Сонымен қатар мұнай бағасының жоғары болуы аясында этанолға тұрақты сұраныс пен тыңайтқыш тапшылығы да бағаның өсуіне ықпал етті.
Ал құмай бағасы импорттық сұраныстың әлсіреуі мен негізгі экспорттаушы елдердегі өндіріс болжамының жақсаруына байланысты 4 пайызға төмендеді.
Күріш бағасының индексі 1,9 пайызға өсті. Бұл негізінен үнді және хош иісті күріш бағасының қымбаттауымен байланысты. Мұнай мен мұнай өнімдері бағасының күрт өсуінен кейін экспорттаушы елдердегі өндірістік және логистикалық шығындардың артуы нарыққа әсер етті.
Өсімдік майларының бағасы 5,9 пайызға өсіп, 2022 жылдың шілдесінен бергі ең жоғары деңгейге жетті. Пальма, соя, күнбағыс және рапс майлары қымбаттады.
Пальма майының бағасы бесінші ай қатарынан өсіп отыр. Бұған биоотын саласындағы сұраныстың артуы, мемлекеттік қолдау шаралары мен мұнай бағасының жоғары болуы себеп. Сонымен қатар Оңтүстік-Шығыс Азиядағы өндірістің төмендеуі мүмкін деген қауіп те бағаға ықпал етіп отыр.
Ет бағасының индексі жаңа рекордтық деңгейге жетіп, бір айда 1,2 пайызға, ал жылдық есепте 6,4 пайызға өсті. Бразилияда мал басын қалпына келтіру жалғасып жатқандықтан, ұсыныстың шектеулі болуы сиыр еті бағасының тарихи максимумға жетуіне әсер етті. Шошқа еті де Еуроодақтағы маусымдық сұраныстың артуына байланысты қымбаттады, дегенмен Бразилиядағы бағаның төмендеуі бұл өсімді ішінара тежеді.
Осы жағдайда сүт өнімдері бағасының индексі 1,1 пайызға төмендеді. Бұл Еуроодақтағы сүт жеткізілімінің молаюы мен Океаниядағы маусым соңындағы күтпеген жоғары өндіріс көлеміне байланысты сары май мен ірімшік бағасының арзандауымен түсіндіріледі.
Қант бағасы бір айда 4,7 пайызға, ал өткен жылмен салыстырғанда 21,2 пайызға төмендеді. Бұған Қытай мен Таиландтағы өндіріс болжамдарының жақсаруы аясында ағымдағы маусымда ұсыныстың мол болатыны туралы күтілім әсер етті. Сонымен қатар Бразилияда қант өңдеудің жаңа маусымының басталуы да нарыққа төмендетуші қысым жасады.
Айта кетелік азық-түлік бағасын енді жасанды интеллект бақылайды.
