Әлемдегі ең үлкен ұшақ Алматы әуежайына келіп қонды
АЛМАТЫ. ҚазАқпарат – Алматы әуежайына дүниедегі ең үлкен Ан-225 «Мрия» ұшағы келіп қонды, деп хабарлайды ҚазАқпарат тілшісі.
Украинадан шыққан ең үлкен жүк ұшағы Алматы әуежайына жанармай құюға тоқтады.
Борт Қытайдың Тяньцзинь әуежайына COVID-19 қарсы күрес құралдары мен медициналық құрал-жабдық алу үшін аттанған.
Тяньцзиньнен Алматыға транзит арқылы Польшаға ұшады.
«Әлемдегі ең ірі жүк көлігі Қытайдан 7 млн Р2 маскасы мен жүз мыңдаған қорғаныс костюмдерін жеткізбек. Жеткізу операциясын KGHM Polska Miedź және Grupa Lotos польшалық компаниялары ұйымдастырып отыр»,- деді әуежайдан.
Мрия ұшағы 1988 жылы Киевте жасалған. Әлемде мұндай ұшақ әзірге біреу-ақ.
Украина көлік стратегиясы орталығы хабарлағандай, бұл - алып ұшақтың 2018 жылғы күзден бергі бірінші сапары.
Польшалық БАҚ хабарлауынша , әлемдегі ең ірі жүк көлігі Варшаваға 14 сәуір таңғы 09.30-да жетеді.
