Әлемдегі жастардың жұмыссыздығы 2010 жылы рекордтық көрсеткішке жетеді - Халықаралық еңбек ұйымы
АСТАНА. Тамыздың 13-і. ҚазАқпарат - Жастар арасындағы әлемдік жұмыссыздық деңгейі 2010 жылы да өсе түседі, сөйтіп оның көлемі 81,2 млн адамға жетеді. Бұл жөнінде кеше тамыздың 12-сінде Халықаралық еңбек ұйымы (ХЕҰ) жасаған баяндамада айтылды, деп хабарлайды РБК.
2007 жылдан 2009 жылға дейін жастар жұмыссыздығы 11.9 пайыздан 13 пайызға дейін өсті. 2011 жылы жастар арасындағы жұмыссыздық 78,5 млн адамға дейін (12,7%-ға) қысқарады деп күтілуде.
Ересектер арасындағы жұмыссыздық 2009 жылы өз шыңына жетті (4,9%), ХЕҰ бағалауынша, 2010 және 2011 жылдары бұл көрсеткіш жыл сайын 0,1%-ға кеми түседі.
2009 жылдың соңына қарай 15-тен 24 жас аралығындағы экономикалық белсенді саналатын 620 миллион жастың 81 миллионы жұмыссыз қалды, бұл бағалау өткізіліп келген жылдардың ішіндегі ең жоғарғы көрсеткіш. Бұл 2007 жылғы көрсеткішке қарағанда 7,8 млн-ға көп.
