Әлемдік БАҚ жағымсыз жаңалықтар таратуға әуес - Билл Гейтс
АСТАНА. ҚазАқпарат - Әлемдік БАҚ жағымсыз жаңалықтар таратуға әуес. Бұл туралы миллиардер Билл Гейтс Time басылымына берген сұхбатында айтты.
Билл Гейтстің сөзіне қарағанда, біз өмір сүріп жатқан әлем дұрыс бағытта дамып келеді. Әлемде кедейлер саны жылдар санап төмендеп, балалардың 90%-ы білім алуда. Алайда БАҚ өкілдері жақсы жаңалықтардан гөрі, жаманды көріп, түймедейді түйедей етіп, елді дүрліктіруге, қорқытуға құштар.
«Жаман жаңалық елді елең еткізіп, жақсы істер елеусіз қалып жатыр», - дейді Microsoft компаниясының негізін қалаушы.
Билл Гейтс аталған басылымға берген сұхбатында жақсылықтан үміт үзбейтінін, біздің әлем жақсы істерге толы екендігін баса айтады.
