Әлемдік БАҚ-тағы Қазақстан: көшпенділер асханасы, венчурлық капитал, инвестициялық қор
Осы аптада шетелдегі басылымдар Қазақстан туралы түрлі материал жариялады. Соның ішінде Президент Қасым-Жомарт Тоқаевтың Әзербайжанға мемлекеттік сапары, Алматыда өткен В5+1 форумы, сондай-ақ еліміздің туристік әлеуеті туралы жазды. Толығырақ Kazinform тілшісінің шолуын ұсынамыз.
Trend: Әзербайжан-Қазақстан жоғары деңгейдегі үкіметаралық кеңесінің бірінші отырысы
Әзербайжандық trend басылымы екі елдің басшылары Әзербайжан-Қазақстан жоғары деңгейдегі үкіметаралық кеңесінің бірінші отырысына қатысқаны туралы жазды. Агенттік олардың баяндамасын жариялап, фото-видеоматериалдар ұсынды.
«Қазақстан мен Әзербайжан – екі бауырлас мемлекет. Соңғы уақытта біздің өзара сапарларымыздың серпіні өте айқын, бұл біздің қарым-қатынасымыздың жаңа серпін алғанын көрсетеді», – деп келтіреді басылым Әзербайжан Президенті Ильхам Әлиевтің сөзін.
Сондай-ақ, басылым Қазақстан Президенті Қасым-Жомарт Тоқаевтың жоғары деңгейдегі үкіметаралық кеңестің отырысын тарихи оқиға деп бағалағанын хабарлады.
«Бұл да – тарихи оқиға. Жаңа ғана біз сауда-экономикалық және инвестициялық ынтымақтастығымызға, халықаралық аренадағы өзара іс-қимылымызға қатысты барлық мәселелерді жан-жақты талқылап, жалпы қорытындыға келдік. Келешегімізден сенім бар, екі елдің үкіметі қол қойылған құжаттар мен келісімдерді жүзеге асыруға кіріседі деген үміт зор», – деді Қасым-Жомарт Тоқаев.
Аzernews: Әзербайжан-Қазақстан бірлескен инвестициялық қоры Баку-Тбилиси-Джейхан арқылы қазақстандық мұнай тасымалын ынталандырады
Әзербайжандық тағы бір басылым azernews екі түркітілдес мемлекет – Әзербайжан мен Қазақстан қарым-қатынасында жаңа тарау ашылып жатқанын хабарлады.
«Осылайша, екі ел де капиталы 300 миллион доллар болатын инвестициялық қор құруды жоспарлап отыр, ол өте маңызды жобаларды қаржыландырады. Самұрық-Қазына ұлттық әл-ауқат қорының төрағасы қордың Орталық Азия елдері, Болгария, Венгрия, Румыния және Түркия экономикасындағы түрлі саладағы басым жобаларды да қаржыландыруды көздейтінін атап өтті. Ол қор Қазақстан мен Әзербайжан арасындағы әріптестікті нығайта түсетінін айтты», – деп жазды агенттік.
The Times of Central Asia: Алматыда өткен В5+1 форумын жоғары дәрежелі спикерлер ашты
Ал, халықаралық The Times of Central Asia басылымы Алматыда өткен B5+1 форумы туралы жазды. Агенттіктің хабарлауынша, аталған платформа, соның ішінде Орталық Азияның бес республикасы мен Америка Құрама Штаттары бар елдер тобы Алматыда бірінші B5+1 форумын ашу арқылы алға маңызды қадам жасады.
«Орталық Азия аймағындағы мемлекеттік-жекеменшік әріптестікті дамыту мақсаты болып саналатын Халықаралық жеке кәсіпкерлік орталығы (CIPE) В5+1 тобын қалыптастыруда маңызды рөл атқарды. Бұл жаңа бизнес-платформа халықаралық және жергілікті компанияларға жаһандық бизнес пен сауда мүмкіндіктерінен пайда табуға көмектесу, сонымен қатар алты елдің үкіметтеріне тікелей шетелдік инвестицияларды көбірек тартуға көмектесу үшін жасалған», – деп хабарлады басылым.
Сондай-ақ, агенттік форумның алғашқы күні «Орталық Азияға көзқарас» деген тақырыппен өткенін жазды.
Daryo: Қазақстанның венчурлық капитал нарығы 2023 жылы 110 миллион доллардан асады
«RISE Research серіктестері EA Group және BGlobal Ventures, сондай-ақ Crunchbase және үкіметтік ұйымдармен бірлесіп жүргізген кешенді зерттеудің соңғы нәтижелері Қазақстандағы және Орталық Азия мен Кавказ аймағындағы венчурлық капиталдың өркендеп жатқанын көрсетті», - деп хабарлады Daryo агенттігі.
«Зерттеулерге сүйенсек, соңғы бес жылда венчурлық капиталды қаржыландыру көлемі бес еседен астам өскен Қазақстандағы венчурлық капитал нарығы айтарлықтай ұлғайды. 2023 жылы аймақтағы венчурлық мәмілелердің жалпы көлемі 110 миллион доллардан асты», – деп жазды өзбекстандық басылым.
Euronews.Travel: Палау, ет және көшпенділердің жаңа асханасы: Қазақстан Орталық Азиядағы келесі ірі гастрономиялық бағытқа айнала ма?
Шетелдік бұқаралық ақпарат құралдарындағы материалдардың топтамасын Euronews.Travel материалымен аяқтаймыз. Басылым еліміздің туристік әлеуетіне шолу жасап, ұлттық тағамдарымыз туралы баяндады. Сондай-ақ, «Қазақстанның гастрономиялық сахнасының орталығы – «нео-көшпелі тағамдары» басты назарда», - деп хабарлады.
«Халықаралық саяхатшылар үшін аз зерттелген орын – Қазақстан шытырман оқиғалы саяхатшыларға бай мәдениет, қар басқан таулар және таңғажайып сәулетті ұсынады. Солтүстігінде Ресеймен, шығысында Қытаймен, оңтүстігінде Қырғызстанмен шектесетін оның мәдени мұрасы географиясы сияқты алуан түрлі. Көшпелілер дәстүрінің, Ислам мәдениетінің және кеңестік дәуір тарихының әсері оның болмысын қалыптастыруға көмектесті», – деп жазды агенттік.
Басылымның тілшісі, негізінен қатал ауа райына бейімделген тайпалар тұтынатын дәстүрлі, көшпелі тағамдар екенін атап өтеді.
«Бұл ас бұрыннан ет, қамыр және пияз сияқты негізгі тағамдардан тұратын, бірақ қазір қазақтың түпнұсқа элементтерін сақтай отырып, баяу дамып, жаңарып жатыр», – дейді Euronews.Travel.
