Әлемдік БАҚ-тағы Қазақстан: ТМҰ-дағы төрағалық, Ресеймен спорттағы байланыс, бюджет тапшылығы
Апта ішінде жаһандағы ақпарат таратушы интернет-басылымдар Қазақстандағы саяси оқиғаларды қапы жібермеді. Соның ішінде Қазақстан мен Ресей қатынасы, мемлекеттің бюджет тапшылығын шешу қадамы, полиэтилен зауытының ЖІӨ-ге әсері қызу қаузалған. Тақырыпқа қатысты ақпарды Kazinform тілшісінің шолуынан оқыңыз.
Daryo: Қазақстан бюджет тапшылығын қалай жеңбек?
ҚР Ұлттық экономика министрі Нұрлан Байбазаров тақырыпқа қатысты түсініктеме беріп, мәселені шешуге бағытталған қадам жайлы айтты. Министр сөзін Daryo таратты.
Ведомство басшысы ел бюджеті екі деңгейден тұратынын еске салды. Біріншісі – республикалық бюжет, кейінгісі – жергілікті бюджет. Екі жүйе ортақ бюджетті қалыптастырады.
– Биыл сегіз айда мемлекеттік бюджеттің кіріс межесі 94 процент орындалды. Алайда оң нәтижеге қарамастан, республикалық бюджеттің кірісі төмендеді. Бұл Үкіметтен тапшылықты жабу үшін қосымша шешімдер іздеуді талап етті, – деді ол.
Министр бюджет тапшылығын жоюдың төте жолы салық жүйесін күшейту екенін айтты. Оның сөзінше, бұл қадам 900 млрд теңгеге жуық қосымша кіріс әкеліп, ҚҚС-ға қатысты шығынды өтеуге және бюджеттік алшақтықты жабуға бағытталатын болады.
Бұдан басқа, Үкімет мемлекеттік холдингтер мен жергілікті бюджеттердің шоттарына шоғырланған өтімділікті тиімді басқару тетіктерін әзірлейді. Жинақталған қаражатты тиімді пайдалануға мүмкіндік беретін қазынашылық басқармаға ерекше назар аударылатын болады. Соған қарамастан, Байбазаровтың айтуынша, Үкімет аймақтық және инвестициялық жобаларды қаржыландыру үшін Ұлттық қордан түсетін трансферттерді пайдалануға мәжбүр.
Нұрлан Байбазаров министрлік Ұлттық қордан қосымша трансферттер сұратуды жоспарлап отырғанын растады, алайда бюджет жобасы Парламентте ұсынылғаннан кейін нақтыланады.
Trend: Полиэтилен зауыты Қазақстандағы ЖІӨ-ні арттырады
Атырау облысында жылына 1 млн 250 мың тонна полиэтилен өндіруге қауқарлы жаңа зауыттың құрылысы басталды. Оған 7,4 млрд АҚШ доллары көлемінде инвестиция тартылған. Жаңа зауытының бой көтеруі Қазақстандағы ЖІӨ-ні 1,2 процентке арттырмақ. Бұл туралы Trend бөлісті.
Зауыт Қазақстандағы өңдеу өнеркәсібіндегі ең ауқымды жобаның бірі. Құрылыс кезеңінде 8000 жұмыс орнын ашылса, іске қосылғаннан кейін 800 тұрақты жұмыс орнын қамтамасыз етеді деп күтілуде.
Құрылысты аяқтау 2029 жылға жоспарланған. Зауыттың жұмысы полиэтилен импортын отандық өніммен алмастыруға, сондай-ақ тауар экспортын арттыруға мүмкіндік береді.
Жоба Қазақстан экономикасына айтарлықтай әсер етіп, аралас салаларды дамытуға және елдің мұнай-газ-химия саласындағы позициясын нығайтады.
Anadolu: Қазақстанның ТМҰ-дағы төрағалығының аралық қорытындысы талқыланды
ҚР Премьер-Министрінің орынбасары – Сыртқы істер министрі Мұрат Нұртілеу Түркі мемлекеттері ұйымының Бас хатшысы Кубанычбек Омуралиевті қабылдады. Кездесу барысында тараптар «TURKTIME!» ұранымен өтіп жатқан Қазақстанның Ұйымдағы төрағалығының аралық қорытындыларын талқылаған. Бұл жөнінде Anadolu агенттігі жазды.
Кездесу барысында Қырғызстандағы кезекті саммитке дайындық процесі де сөз болған. Министр Қазақстан Ұйымды құру бастамашысы ретінде түркі интеграциясын одан әрі дамытуға ерекше мән беретінін мәлімдеді. Сонымен қатар ол ТМҰ-дағы Қазақстанның төрағалығы түркі елдерінің игілігін, дамудың тың бағыттарын және бауырластық байланысты нығайтып, өңірдегі тұрақтылықты қамтамасыз етуге бағытталғанына назар аударды.
Өз кезегінде Бас хатшы Қазақстанның ТМҰ-дағы төрағалығы аясында ынтымақтастықтың 30 түрлі саласы бойынша 80-нен астам іс-шара өткізілгенін хабарлады. Негізгі іс-шара ретінде Астанада V Дүниежүзілік көшпенділер ойындарын өткізу болды. К.Омуралиев Ойындарға қатысушылардың санының ұлғаюы түркі көшпелі мәдениетіне деген қызығушылықтың белгісі екенін атап өтіп, шараның ұйымдастыру деңгейін жоғары бағалады.
CentralAsia: Қазақстан мен Ресей спорттық байланысын нығайта түспек
Қос мемлекет олимпиадалық базаны ортақ пайдалануды көздеуде. ҚР Туризм және спорт министрі Ербол Мырзабосынов Дүниежүзілік көшпенділер ойыны аясында РФ Спорт министрі Михаил Дегтяревпен жолығып, тақырыпқа қатысты мәселені талқылады. Бұл туралы CentralAsia хабарлады.
– Кейінгі екі жылда қазақстандық спортшылар Ресей аумағында 40-тан астам оқу-жаттығу жиынын өткізді. Бұл екі ел арасындағы спорттық байланысты нығайтатыны сөзсіз. Қазақстан олимпиадалық даярлық орталығы базаларын пайдалану арқылы осы тәжірибені жалғастыруды ұсынады, – деді министр.
Кездесу барысында министр екі елдің ынтымақтастығының жоғары деңгейде екенін айтып, БРИКС елдерінің спорттық ойындары және «Азия балалары» халықаралық спорт ойындары секілді негізгі халықаралық спорттық іс-шараларды өткізудегі жетістіктерін атап өтті. Қазақстан ұлттық құрамасынан биылғы БРИКС елдері ойындарына – 108, «Азия балалары» ойындарына 200 спортшы қатысты.
Сонымен қатар ұлттық спорт түрлерін дамыту мәселесіне де ерекше назар аударылғанын айта кеткен жөн. Мәселен, V Дүниежүзілік көшпенділер ойындарының бағдарламасына Саха Республикасының (Якутия) ұлттық спорты – мас-рестлинг пен татар халқының ұлттық күресі – корэш енгізілді. Ойындарға Ресей Федерациясының 197 өкілі қатысты.
ТАСС: «Шексіз бауырластық-III»арнайы мақсаттағы бөлімшелердің оқу-жаттығуы өтіп жатыр
Түркістан облысында 6 елдің арнайы мақсаттағы бөлімшелерінің көпұлтты оқу-жаттығуы басталды. Жаттығуға Иордания мен Қырғызстан Қарулы күштерінің өкілдері бақылаушы ретінде шақырылды. Бұл туралы ТАСС мәлімдеді.
– Түркістан облысының «Орда» таулы оқу-жаттығу полигонында Әзербайжан, Қазақстан, Катар, Пәкістан, Түркия және Өзбекстан арнайы мақсаттағы бөлімшелерінің оқу-жаттығуы өтті. Жиынға Иордания мен Қырғызстан Қарулы күштерінің өкілдері бақылаушы болды, – деді ҚР Қорғаныс министрлігінің баспасөз қызметі.
Оқу-жаттығу тәжірибе алмасу, басқару органдары мен әскери контингенттердің жедел үйлесімділік деңгейін арттыруға бағытталған. Сондай-ақ бөлімшелер жеке құрамының білімін арттыруға да көмегі зор. Әскери маневрге 300-ге жуық әскери қызметші қатысуда. Шарада брондалған техника, армия авиациясы және ұшқышсыз ұшу аппараттары сыналды.
– Ел аумағында 6 мемлекеттің арнайы мақсаттағы бөлімшелерінің қатысуымен мұндай форматтағы оқу-жаттығу алғаш рет өткізілуде. Оқу-жаттығу барысында жиналған тәжірибе бөлімшелердің жауынгерлік дағдысын арттырары сөзсіз. Мұның барлығы мемлекеттердің қорғаныс қабілетін ілгерілетуге ықпал ететініне сенімдімін, – деді Қазақстан Қарулы Күштері арнайы операциялар қолбасшысы Айдос Мырзахметов.
