Әлемге әйгілі хореограф Ю. Григорович «Астана Опера» театрымен тұрақты түрде жұмыс істеуді қалайды

АСТАНА. 2 шілде. ҚазАқпарат - Ертең, шілденің 3-і күні «Астана Опера» мемлекеттік опера және балет театрында Петр Чайковскийдің әлемге әйгілі шығармасы - «Ұйқыдағы ару» балеті қойылады. Осыған орай бүгін Астанада балеттің шығармашылық ұжымының қатысуымен баспасөз мәслихаты өтті.

Айта кеткен жөн, «Ұйқыдағы ару» жаңа хореографиялық нұсқада сахналанбақ. Оның авторы - әлемдік хореографияның мэтры атанған Юрий Григорович. Қоюшы суретші, сценограф - танымал Эцио Фриджерио. Ал киім бойынша суретші - Оскар сыйлығының иегері Франка Скуарчапино арнайы Италиядан шақыртылды. Оның қатысуымен XVII-XVIII ғасырларда болған киім үлгілері тігіліп, кәсіби суретшілердің қолымен кестеленіп өрнектелді. Киім-кешектің басым бөлігі Милан мен Мәскеуде дайындалды. «Негізі, «Астана Опера» театрында барлық жағдай жасалған. Балет труппасының шеберлігі де жоғары. Оған қатысты менде ешқандай сын-ескертпелер жоқ. Енді, көрермен қауым өз бағасын береді. Маған бұл жерде өте ұнады. Сондықтан «Астана Опера» тарапынан тағы шақыру түсетін болса, мен ол шақыруды қуана-қуана қарсы аламын», - дейді белгілі хореограф Ю. Григорович.