Әлеуметтік корпорациялар бюджет қаражатын депозитке салудан ғана табыс тапқан
АСТАНА. ҚазАқпарат – Әлеуметтік кәсіпкерлік корпорациялар бюджет қаражатын банктерге депозитке салып қана табыс тапқан. Бұл туралы Мәжіліс депутаттарының сауалына ҚР Сыбайлас жемқорлыққа қарсы іс-қимыл агенттігінің төрағасы Олжас Бектеновтің жауабында айтылған.
«ӘКК көпшілігінің пайдалылығы жалған (күмәнді) болып табылады. Өйткені ол, негізінен, банктердегі депозиттерге орналастырылған бюджет қаражаты бойынша пайыздардың есебінен, сондай-ақ балансқа берілген мемлекеттік мүлікті сатудан құралады. Мәселен, «Shymkent» ӘКК акцияларын төлеуге кадастрлық құны 2 млрд теңге болатын 70 жер учаскесі (200 гектар) берілді. Оның ішінде 29 жер учаскесі (36,7 га) кейіннен кәсіпкерлік субъектілеріне 5,89 млрд теңгеге қайта сатылды», - деді агенттік төрағасы.
Оның дерегінше, 2019-2021 жылдары ӘКК «табысты» деп аталатын банктердегі депозиттер бойынша пайыздар сомасы («Түркістан», «Ертіс», «Алматы», «Байқоңыр», «Тобыл», «Жетісу» және «Shymkent») 4,4 млрд теңгеге жетті. Ал жалпы пайда 5 млрд теңгені құрады.
«Талдау көрсеткендей, ӘКК-дегі сыбайлас жемқорлық тәуекелдерінің негізгі себебі – олардың қызметінің заңнамалық реттелмеуі, өңір басшысының тарапынан тиісті бақылаудың болмауы және жеке пайдакүнемдік мақсаттарға қол жеткізу үшін корпорациялардың жекелеген басшыларының іс жүзіндегі қасақана іс-әрекеттері. Бұл ретте өндірістік процестер, оның ішінде операциялық мәселелер ӘКК басшылығының қалауына қарай өзгеретін ішкі құжаттармен (қағидалар, нұсқаулықтар, ережелер, жарғылар) регламенттеледі», - деді ол.
