Әлеуметтік қызмет көрсететін ұйымдарда тұратындар саны былтыр 218 адамға артты
АСТАНА. 2 шілде. ҚазАқпарат - 2011 жылы Қазақстан Республикасында тұрғылықты тұруды қамтамасыз етумен бірге әлеуметтік қызмет көрсететін 293 ұйым есепте тұр.
Оның ішінде қарттар мен мүгедектерге арналған 87 интернат-үйі және мүгедектерге арналған 27 балалар интернат-үйі, сондай-ақ осындай қызмет көрсететін ұйымдардың басқа 179 түрі бар. Сонымен қатар, 2010 жылмен салыстырғанда ұйымдар саны 8 бірлікке ұлғайды (2,8 пайыз), соның ішінде қарттар мен мүгедектерге арналған интернат-үйі - 3 бірлікке (3,6 пайыз), басқа ұйымдар түрі - 5 бірлікке (2,9 пайыз) артты. Бұл туралы Статистика агенттігінен қабылданды.
Агенттік баспасөз қызметінің хабарлауынша, аталған ұйымдардың барлығы (100 пайыз) электр қуатымен жабдықталған, 288-інде (98,2 пайыз) - кәріз және 289-ында (98,6 пайыз) - су құбыры, және 175-інде (59,7 пайыз) орталық жылыту жүйесі бар. 2010 жылмен салыстырғанда кәрізбен 8 ұйым, су құбырымен - 9 ұйым, орталық жылыту жүйесімен - 3 ұйым қосымша камтамасыз етілді.
Жыл соңына қарай осы ұйымдарда тұратындар саны 34477 адамды құрады. Оның ішінде әйелдер - 15678 адам (45,5 пайыз), жасы бойынша зейнеткерлер - 5990 адам (17,4 пайыз), Ұлы Отан соғысының ардагерлері мен мүгедектері - 117 адам (0,3 пайыз).
Бұл ұйымдардағы тұратындар саны 2010 жылмен салыстырғанда 218 адамға немесе 0,6 пайызға артты. Соның ішінде жасы бойынша зейнеткерлер саны 175 адамға (3 пайыз) көбейді.
