Әлеуметтік саладағы мемлекеттік-жекешелік әріптестіктің кешенді бағдарламасы әзірленеді

None
АСТАНА. ҚазАқпарат – Мемлекет басшысы Қасым-Жомарт Тоқаев Үкіметтің кеңейтілген кеңесінде Ұлттық қорға жармаса беруді доғару қажеттігін баса айтты, деп хабарлайды ҚазАқпарат тілшісі.

«Ұлттық қорға жармаса беруді доғару қажет. Мен бұл туралы осыған дейін де талай рет айттым. Ұлттық қор – болашақ ұрпақтың қаражаты. Біз оның ресурстарын тек қажетті жағдайларда, дағдарыс кезеңдерінде пайдалануымыз керек. Мемлекеттік-жекешелік әріптестік және жан басына шаққандағы қаржыландыру институтын, әсіресе әлеуметтік инфрақұрылымға инвестициялар тарту үшін толық көлемде пайдалану қажет.

Өткен жылдың желтоқсан айында мемлекеттік-жекешелік әріптестіктің жаңа моделін енгізуге бағытталған заңнамалық түзетулерге қол қойдым. Жеке әріптестерді іріктеу рәсімдерінің ашықтығын қамтамасыз ету үшін шаралар қабылданды, квазимемлекеттік кәсіпорындардың қатысуы шектелді», - деді Қасым-Жомарт Тоқаев.

Айтуынша, бұл шаралар бизнесті мемлекеттік жобаларды іске асыруға тартуға мүмкіндік береді.

«Бұл құрал жаңа ұлттық жобаларды іске асыру кезінде барынша пайдаланылуы тиіс. Үкіметке әлеуметтік салада мемлекеттік-жекешелік әріптестіктің кешенді бағдарламасын дайындауды тапсырамын», - деді Мемлекет басшысы.

Айта кетейік, Үкімет үйінде Президент төрағалығымен елдің әлеуметтік-экономикалық даму мәселелері жөнінде кеңес өтіп жатыр.


Соңғы жаңалықтар